پسپۆڕێك: هیچ ڤاكسینێك نییه‌ له‌ 100% رێگری له‌توشبوون به‌كۆرۆنا بكات

.

شاره‌زایه‌كی بواری بایۆلۆجی و ڤایرۆسه‌ ژینگه‌ییه‌كان، ئه‌مڕۆ سێشه‌ممه‌ 22ی حوزه‌یرانی 2021 جه‌ختیكرده‌وه‌ كه‌ هیچ ڤاكسینێكی وا كاریگه‌ر نییه‌ كه‌ بتوانێت له‌ 100% رێگری له‌توشبوون به‌ڤایرۆسی كۆرۆنا بكات.

د.حه‌یده‌ر موعته‌ز موحی، پسپۆڕی بواری بایۆلۆجی و ڤایرۆسه‌ ژینگه‌ییه‌كان، له‌میانی لێدوانێكی تایبه‌تدا له‌گه‌ڵ PUKmedia رایگه‌یاند: سه‌رجه‌م ئه‌وانه‌ی هه‌ردوو دۆزی ڤاكسینی دژ به‌كۆرۆنایان وه‌رگرتووه‌، پێده‌چێت جارێكی تر تووشی ڤایرۆسه‌كه‌ ببنه‌وه‌، چونكه‌ جه‌سته‌ی مرۆڤ ماوه‌یه‌كی وای پێویسته‌ تاوه‌كو بتوانێت دژه‌ ته‌نه‌كانی دژ به‌ ڤایرۆسه‌كان دروستبكات.

راشیگه‌یاند: ئه‌و كه‌سانه‌ی كه‌ هه‌ردوو دۆزی ڤاكسینیان وه‌رگرتووه‌و له‌ئه‌گه‌ری توشبوونیان جارێكی تر به‌كۆرۆنا، حاڵه‌ته‌كانیان له‌نێوان سووك و مامناوه‌ندیدا ده‌بێت و ناگاته‌ ئه‌وه‌ی توشبووه‌كه‌ به‌كۆڤید-19 گیانله‌ده‌ست بدات.

موحی وتیشی: هیچ ڤاكسینێكی وا كاریگه‌ر نییه‌ كه‌ بتوانێت له‌ 100% رێگری له‌توشبوون به‌كۆڤید-19 بكات، چونكه‌ كاریگه‌ریی ته‌واوی ڤاكسینه‌كه‌ دوای دوو هه‌فته‌ بۆ 20 رۆژ له‌وه‌رگرتنی دۆزی دووه‌می ڤاكسینی دژ به‌كۆرۆنا ده‌رده‌كه‌وێت كه‌ ده‌توانێت دژه‌ ته‌نه‌كان له‌ناو جه‌سته‌ی مرۆڤدا دروستبكات.

PUKmediaتایبه‌ت