riklam

ئەگەر ناهێڵن ئاشتبینەوە، با چارەسەر بدۆزینەوە

بیروڕا 12:18 PM - 2021-06-14
.

.

پیدەچێت هەندێ نووسەر یان سیاسەتوانی سەر بە پارتی قەڵس بن كە لێرەولەوێ دەبیستن دەنگەكان داوای ئاشتی و دیالۆگ دەكەن و شەڕی یەكتر كوژی رەتدەكەنەوە، ئەویش بەو بیانووەی كە ئەوان دەیانەوێت هەموان وەك پارتی بیربكەینەوە و پەكەكە تاوانبار بكەین، دەنا نابێت هەردوولا وەك یەك سەیر بكەین.

ئاشتی واتا ئاشت بوونەوە و دەستكردنە نێو دەستی یەك، واتا واژۆكردنی رێكەوتننامە و دوور كەوتنەوە لە گرژی و نەهێشتنی گرفتەكان، كەئەمەش كرا ئەوە دوژمنی هەرە گەورەی هەموان ( ئەردوگان و حزبەكەی و شوفێنیستانی دیكەی تورك) رازی نابن، لەگەڵیشیدا شۆڤێنیستانی دیكەی عەرەب. ئەوان دەیانەوێت ئاژاوە بكەوێتە ناو خاكی هەرێم و بەمەش بە تیرێك چەند نیشانەیەك دەشكێنن نەك تەنها دوو.

توركیا شەڕەكەی لە چوار چێوەی خۆی دوور خستوەتەوە و هێناویەتە ناو خاكی هەرێم، جێ پێی خۆی قایم دەكات و تادێت زیاتر هێز دەچەسپێنێت، ئەمەش رەنگە ستراتیژێكی درێژخایەنی لە پێش بێت و پەیوەندی هەبێت بە دەست بەسەرداگرتنی كەركوك لەرێگەی ئەوانەوە كە ئەڵقە لەگوێی خۆین.

توركیا پێی باشە ماڵێكی كورد وێران ببێت نەك هەر گوندێك، ئەوان دەیانەوێت سەقامگیریی لەم هەرێمەدا نەمێنێت، ئەوان دەیانەوێت حزب و خەڵكی هەرێم بخەنە ئەو زەلكاوەوە كە ناچاریان بكات هانا بۆ خۆی بەرن و بیان بەستێتەوە.

ئەگەر ئێمە هەموان ئەم راستییە بزانین و لەو مەترسییەش تێبگەین كە توركیا  بۆسەر ئێمەی دروست كردوە، ئەگەر بمانەوێت رێگە بگرین لە بەدیهاتنی مەرامەكانی توركیا و دوژمنانی دیكە، دەبێت بیانوو نەدەین بەدەستەوە و رێگە بگرین لەكار ئاسانی بۆیان.

دەبێت پارتی خۆی دوور بخاتەوە و لە ژێر هەژموونی توركیادا بێتەدەر، با وای پیشان بدات كە ئەوە هەر هەرێم نییە پێویستی بە بوونی پەیوەندییەكی باش هەیە لەگەڵ توركیادا، بەڵكو توركیاش لەنەبوونی پەیوەندییەكی لەو چەشنە لەگەڵ هەرێم زیانێكی ئابووری گەورەی پێدەگات.

هەرچی پەكەكەیە، وەك حزبێكی ئازادیخوازی داكۆكیكار لەمافەكانی گەلی كورد لە توركیا، خەبات و قوربانییەكانیان بەرز دەنرخێنم، بێگومانم لەوەی هەق لای ئەوانە لەبەرامبەر حكومەتە شوفێنییەكانی ئەنقەرە، بەڵام باشترە ئەوان دوو رێگە هەڵبژێرن ئەویش: 

1- بەوپێیەی كە ئەم سەردەمە، سەردەمی یەكلاكردنەوە بە چەك نییە، تەرازووی هێز لەگەڵ دوژمن زۆر جیاوازیی هەیە، ئەوان سەدان جار بەتواناتر و خاوەن تەكنیكی سەربازی بەهێزترن، وا پێویست دەكات پەكەكە بڕیاری نەهێشتنی هێزی چەكداری بدەن و لەرێگەی رێكخستنەكانیانەوە درێژە بەكاری سیاسیی بدەن و خۆیان بخزێننە ناو پەرلەمان و سەرۆكایەتی شارەوانییەكان.

هیچیش روونادات ئەگەر تەنانەت ناوی حزبەكەشیان بگۆڕن یان لەناو هەدەپەدا بتوێنەوە و دابەش ببن، دەكرێت چیدی كەسێك نەیەتە شاخ و نەبێتە گەریلا، لەبری ئەوە با لە زانكۆكان، ناوبازاڕ، فەرمانگە و كارخانەكان، كێڵگەكان هتد خەریكی كاری رێكخراوەیی بن و تاكەكانیان هۆشیار بكەنەوە تا لەو ستەمە تێبگەن كە توركیا دەیكات.

2- ئەگەر پەكەكە ئەوە نەكات باشترە هەر بەم شێوازەی ئێستایەوە خۆیان بگەیەننە چیاكانی ناو توركیا و لە نزیكەوە شەڕی پارتیزانی چڕ و بەردەوام لەگەڵ توركیا بكەن و ئەم ناوچانە چۆڵ بكەن كە سەر بە هەرێمی كوردستانە، ئەوەش لەبەر ئەوەنا كە خاكی ئەوان نییە، نەخێر بەڵكو وەك تاكتیكی عەسكەری بۆ پاراستنی كورد، خۆ ئەم بەشەش هەر كوردن و ئەزموونێكیان بەدەستەوەیە كە حوكمی خۆسەرییە و كیانێكی فیدراڵییە و بەئاسانی نەهاتوەتە دی، هەر هۆكارێك وای كردبێت و ئاسانكاریی كردبێت بۆ ئەنجامدانی راپەڕین ئەوە بەو مانایە نییە كە ئەمەی ئێستا بەگرنگ و هەند وەرنەگیرێت. 

ئێمە وەك كورد، نابێت شوێنێك بكەینە قوربانی شوێنێكی دیكە، ئەوەی هەرێم بۆ تێك بدەین؟ كە سوور دەزانین بەتێكدانی ئەمە نەك شارێك بەڵكو گوندێكی كوردستانی باكوور رزگاری نابێت.

باشترە پەكەكە ئەو راستییە تاو و توێ بكات، ئەو راستییەی كە پێمان دەڵێت لەم سەردەمی پێشكەوتنی تەكنۆلۆژیای سەربازییەدا بەو چەكە سادانەوە ناتوانین هیچ حكومەتێك بڕوخێنین، یان ئیجباری بكەین چۆك بۆ داواكانمان دابدات، لەبری ئەوە دەبێت تاكتیك و فێڵی دیكە بەكار بهێنین، ئەویش خۆخزاندنە ناو خەڵكی شارەكانە و بردنەوەی كورسییەكانی پەرلەمانە. 

تا ئاڵۆزی هەبێت توركیا قازانجی گەورە دەكات، ئەو باكی نییە و دەتوانێت لە چەند خولەك و كاتژمێردا هەزاران سەرباز داببەزێنێت لە هەركوێ كە بیەوێت، ئەو جەندرمە بە كوشت دەدات كە بەپارە یان بە ئیجباری و كرێگرتەیی دایناون، بەڵام ئێمە رۆڵە بەنرخ و بە هەستەكانمان دەكەینە قوربانی، لێگەڕێن با ئەو رۆڵانە چیدی شەهید نەبن، با ئەوان لەبری ئەوە بەشداریی لە بنیادنانی كۆمەڵگەیەكی كوردی دا بكەن، با لە ماڵەوە هاندەری قسەكردن بن بەزمانی كوردی و هەستی كوردانە.

هەرچی ئیدارەی نوێی بایدنیشە، سەرەڕای ئەوەی لە هەڵوێستە یاخیانەكەی ئەردوگان نارازین سەبارەت بە كڕینی چەكی روسی و هەڵوێستیان بەرامبەر رۆژئاڤا و لاوازییان لە ناتۆدا و پەیوەندییان بە وڵاتانی ئەوروپاوە، بەڵام زۆر شتی دیكە هەیە وادەكات بۆ رازی كردنی توركیا كە لەشتێكی دیكەدا قوتاریان بكات وەك ( كشانەوەیان لە ئەفغانستان و قووڵكردنەوەی كێشەی نێوان روسیا و ئوكرانیان) هاوكارییان بكات، بۆ ئەمەش ئاسانترین شت بەلای ئەمریكاوە كە بیكات لێدانی پەكەكەیە، هاوشێوەی ئەو هێرشانەی كردیە سەر ئەنساری ئیسلام لە چیاكانی هەورامان و تێكی شكاندن، هەموو ئەم ئەگەرانە دەبێت رەچاو بكرێن.

لەدەرەوەی ئەمە بارودۆخەكە پێناچێت چاوەڕوانی ئاشتیی بكات چونكە ئەوەی هەژموونی بەسەر ناوچەكەدا ( بادینان) هەیە توركیایە و ئەو هاندەر و خوازیاری ئەم شەڕ و ئاژاوانەیە.

 پەكەكە بیانوویەكە بۆ توركیا، لەرێگەیەوە چاوچنۆكییەكانی بۆسەر خاكی عیراق و هەرێم بەدیدێنێت، ئەوان دەیانەوێت خەونی گەڕانەوەی ئیمپراتۆریەتی عوسمانی باوك مردوویان بگەڕێننەوە لەسەر دەستی ئەردوگان كە وای پیشان دەدات.

ئەگەر بیانوو نییە خۆ 500 ساڵ بەر لە ئێستا پەكەكە نەبووە كە ئەوان زۆربەی خاكی عیراقیان لەبن دەستدا بووە.

بەڵام جیاوزییەكەی ئەمڕۆ لەگەڵ زەمەنی عوسمانیدا ئەوەیە كە دونیای ئەمڕۆ چاوكراوەترە و وڵاتان خۆیان بە دامەزراوەیی كردووە و چەندین هاوپەیمانێتی هەن و هێزەكان دابەش بوون بەسەر چەند وڵاتی زلهێزدا و ململانێكان لە پێشكەوتنی خێرا و بەردەوامدان و تەكنولۆژیای سەربازی و بۆشاییەكانی ئاسمان هەموویان زۆر چوونەتە پێش و لەوە گەورەترن كە ئەردوگان خەویان پێوە دەبینێت.

ئەگەر چاوی سووری ئەمریكا لەسەر توركیا نەبوایە ئەوە لەشەو و رۆژێكدا (رۆژئاڤای) دەخستە بن دەستی خۆی. ئەگەر هاوپەیمانێتی ئەمریكا و وڵاتانی دیكە نەبێت ئەوە توركیا ( بمانەوێت یان نا، تا نزیك بەغدا دەچێت و كارتی ئاویان لەگەڵ بەكار دێنێت بۆ خۆسەپاندن. 

وڵاتانی عەرەبییش چییان لەبەرامبەر ئیسرائیل پێدەكرێت ( لە كێشەی فەلەستین) دا هەر ئەوەندەش بۆ عیراق دەكەن لەبەرامبەر داگیركاریی توركیا.

ئەمانە راستین، ئێمە دەزانین كە وڵاتانی دونیای زلهێز بۆچی لێرەن و چۆن هاتوون، دەشزانین بۆچی داكۆكی سنووردارمان لێدەكەن، بۆیە دەبێت داوا و سەرنجەكانیان بەهەند وەربگرین.

ئەوان چەندین جار جەختیان لەسەر ئەوە كردووەتەوە كە نابێت پەكەكە لە هەرێمی كوردستاندا هەبن، كەوابوو پێیان وایە بە دەرچوونیان لێرە كێشەكە دەگوازرێتەوە بۆ ناو خاكی توركیا، كە ئەمەش رویدا، ئیدی نە بیانوویەك بۆمانەوەی توركیا دەمێنێت، نە حكومەتی هەرێم و حزبەكانیش دەخرێنە ژێر گوشارەوە و ناچار بە سازش دەكرێن.

ماوە بڵێین، هەندێك باوەڕیان وایە كە بەیەكگرتنی هەمووان دەتوانین كوردستان رزگار بكەین، ئەمە دوورە لە واقیعی ئەمڕۆوە، دروست بوونی دەوڵەتی كوردی سەرتاسەریی مەحاڵە لەدوای دابەشبوونێكی 100 ساڵە و بەو مەرجەش كە نزیكەی 500 ساڵ لەژێردەستی عوسمانییەكاندا بووە و رێگریی لێكراوە وەك نەتەوە خۆی بناسێنێت.

بەڵام دەكرێت كە لەهەر پارچەیەك كە كوردی تیادا دەژی و خاكییان لەوێدایە، لە رێگەی مومارەسەكردنی ژیانی سیاسییەوە مافەكانیان بەدی بهێنن، هەر وەك ئەوەی ئێستا لەم هەرێمەدا دەیبینین. 

درێژەدان بەم شێوازەی ئێستا ماڵی دوژمن رێكدەخات و ماڵی كوردیش لەبەریەك هەڵدەوەشێنێ.

نووسینی.. هیوا محەمەد

PUKmedia تایبەت

 

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket