بافڵ تاڵەبانی: نابێت ھیچ نەتەوەیەكی عیراق پشتگوێ بخرێت

.

وەفدی باڵای یەكێتیی نیشتمانیی كوردستان بەسەرۆكایەتی بافڵ تاڵەبانی لەگەڵ محەمەد حەلبوسی سەرۆكی ئەنجومەنی نوێنەرانی عیراق كۆبووەوە و رایگەیاند، پێویستە ھەموومان باوەڕمان بە داڕشتنی سیاسەتێكی نوێ ھەبێت بۆ بەڕێوەبردنی عیراق و دەستوور بنەمای پەیوەندییەكان بێت و ھیچ نەتەوە و پێكھاتەیەك پشتگوێ نەخرێت.

لەكۆبوونەوەكەدا وێڕای بیروڕا ئاڵوگۆڕكردن لەسەر پەرەسەندنە سیاسییەكان، پرسی كاری ئەنجومەنی نوێنەران، یاسادانان و چاودێریكردنی دەسەڵاتەكان و پارێزگاری لەمافی گشتی و نەتەوە و پێكھاتەكان لەڕێگای شەرعییەتی پەرلەمانییەوە گفتوگۆی لەبارەوە كرا و جەخت لە تێگەیشتن و پەنابردن بۆ زمانی گفتوگۆ كرایەوە بۆ رووبەڕووبوونەوەی كێشەكان و چارەسەركردنیان.

بافڵ تاڵەبانی لەبارەی كێشەكانی ئەمڕۆی ھەرێم و عیراق و قوڵبوونەوەی ناكۆكییەكان پێشنیاری دیالۆگی نیشمانی لەنێوان ھەموو ھێزەكان كرد بۆ گەیشتن بەرێككەوتن و لێكتێگەیشتن و رایگەیاند: دەبێت چیتر بە لۆژیكی زۆرینە و كەمینە مامەڵە لەگەڵ یەكتر نەكرێت و ببێتە پێوەر بۆ تێپەڕاندنی یاساكان چونكە ئەمە دۆخەكە ئاڵۆزتر دەكات. پێویستە ھەموومان باوەڕمان بە داڕشتنی سیاسەتێكی نوێ ھەبێت بۆ بەڕێوەبردنی عیراق و دەستوور بنەمای پەیوەندییەكان بێت و ھیچ نەتەوە و پێكھاتەیەك پشتگوێ نەخرێت.

لەبەشێكی تری كۆبوونەوەكەدا جەخت لە ئەنجامدانی زەمینەی لەبار بۆ ئەنجامدانی ھەڵبژاردنێكی پاك و بێگەرد و دابینكردنی ئاسایشی ھەڵبژاردن كرایەوە بەشێوەیەك كە مافی ھەموولایەك پارێزراوبێت.

PUKmedia تایبەت