ژێرپردەكە.. كۆنترین گوزەری میلیی سلێمانی

.

شەقامی مەحوی كە لەلای خەڵكی سلێمانی زیاتر بە ژێر پردەكە یاخود مەیانی ماستەكە ناسراوە و یەكێكە لە كۆنترین و دێرینترین بازاڕەكانی سلێمانی و زیاتر كەلوپەلی (خۆراكیی و ناوماڵ) ی تێدا فرۆشراوە، جگە لەوەش گەراجی سەرەكی وەستانی ئەسپ و عەرەبانە بووە كە لەسەرەتای دروستبوونی  شاری سلێمانیدا لەجیاتی ئۆتۆمبێل بەكارهاتووە. 

ژێرپردەكەی سلێمانی بازاڕێكیش بووە بۆ ساغكردنەوەی بەرهەمە دانەوێڵەییەكان و ئاژەڵی گوندنشینانی دەوروبەری شارەكە، نزیكەی سەدەیەكە ئەم گوزەرە بۆتە جێگایەك بۆ ساغكردنەوەی خۆراكی خۆماڵی و ئەو گیاندارانەی لەماڵەوە رادەگیرێن و ماڵیی دەكرێن و ئەو پەلەوەرانەشی گۆشتەكانیان بۆ خواردن دەشێت وەك ( قەل ، قاز ، كەو ، كەڵەشێر ، مراوی ، مریشكی كوردی و سوێسكە ) .

ژێرپردەكەی سلێمانی یەكێكە لەو بازاڕانەی بەتایبەت لە رۆژانی هەینیدا مامەڵەی كڕین و فرۆشتنی چەندین تەیر و باڵندەی گرانبەهای تێدا دەكرێت و لە شارەكانی تری كوردستانەوە خەڵك سەردانی ئەم شوێنە دەكەن.

PUKmedia فۆتۆ.. ڤینۆس تۆفیق