ڕ‌ێكخراوی ئازادی و مافی مرۆڤ: ڕ‌اگیراوانی بادینان ئه‌شكه‌نجه‌دراون

.

ڕ‌ێكخراوی ئازادی و مافی مرۆڤی نێوده‌وڵه‌تی له‌ هه‌رێمی كوردستان-عیراق سه‌باره‌ت به‌ سزادانی پێنج ڕ‌ۆژنامه‌نوس و چالاكی مه‌ده‌نی له‌ هه‌رێمی كوردستان ڕ‌اگه‌یه‌ندراوێكی بڵاوكرده‌وه‌ و تێدا هاتووه‌ كه‌ له‌گه‌ڵ ڕ‌اگیراوانی بادینان مامه‌ڵه‌ی نه‌شیاو كراوه‌ و ئه‌شكه‌نجه‌ دراون و به‌ زۆر ئیمزایان پێكراوه‌.

 ڕ‌اشیگه‌یاندووه‌ ئه‌وان وه‌ك ڕ‌ێكخراوی ئازادی و مافی مرۆڤی نێوده‌وله‌تی له‌ هه‌رێمی كوردستانی-عێراق به‌وردی چاودێری دادگایكردنی پێنج رۆژنامه‌نوس و چالاكی مه‌ده‌نی به‌ ناوه‌كانی (شێروان شێروانی - شڤان سه‌عید - ئه‌یاز كه‌ریم - مه‌ریوان عیسا و گۆهدار زێباری) كردووه‌ و چه‌ندین تێبینییان داوه‌ته‌ حكومه‌تی هه‌رێمی كوردستان و روونیان كردۆته‌وه‌ كه‌ دادگایی كردنه‌كه‌دادپه‌روه‌رانه‌ نه‌بووه‌ هه‌روه‌ها له‌ كاتی وه‌رگرتنی وته‌ی راگیراوه‌كاندا پارێزه‌ریان نه‌بووه‌ و به‌شێوازێكی نه‌شیاو مامه‌ڵه‌یان له‌گه‌ڵدا كراوه‌ به‌زۆر ئیمزایان پێكراوه‌.

 هه‌ربه‌پێی یاسا تۆمه‌تبار ده‌بێت له‌ شوێنی ئه‌نجامدانی كاره‌كه‌ی دادگایی بكرێت، به‌ڵام ئه‌وان گواستراونه‌ته‌وه‌ بۆ دادگای هه‌ولێر و ئه‌مه‌ش به‌مه‌به‌ستی سزادانیان و له‌كاتی دادگایی كردنه‌كه‌دا راگیراوه‌كان نه‌یانتوانیوه‌ تانه‌ بده‌ن و باسی ئه‌وه‌شیان كردووه‌ كه‌ له‌ژێر ئه‌شكه‌نجه‌دا دانپێدانانیان پێكراوه‌ جگه‌له‌وه‌ی شوێنی زیندانی كردنیان گونجاو نه‌بووه‌ و هه‌ربۆیه‌ مانگرتنیان راگه‌یاندووه‌.

ڕ‌یكخراوی ئازادی و مافی مرۆڤی نێوده‌وله‌تی داوای له‌ حكومه‌تی هه‌رێمی كوردستان كردووه‌ ڕ‌اگیراوه‌كان ئازاد بكات و له‌ ئه‌گه‌ری ئازاد نه‌كردنی ڕ‌ۆژنامه‌نووسان و چالاكانی مه‌ده‌نی داوایی یاسایی له‌ دادگای نێوده‌وڵه‌تی تۆمار ده‌كه‌ن وه‌ك فشارخستنه‌ سه‌ر ده‌سه‌ڵاتی دادوه‌ری له‌ هه‌رێمی كوردستان- عیراق و داواش له‌سه‌رجه‌م كۆنسوڵخانه‌كان ده‌كات پێدانی ڤیزا به‌ كه‌سانی به‌شدار له‌ دادگایی كردنه‌كه‌ ڕ‌ابگرن.

PUKmedia