هاوسەرۆكان و وەفدێكی باڵای بەریتانیا چەند پرسێكی ئەمنی و سیاسی تاووتوێ دەكەن

.

ئەمڕۆ 5ی5ی 2021 بافڵ تاڵەبانی و لاهور شێخ جەنگی هاوسەرۆكانی یەكێتیی نیشتیمانیی كوردستان لە بارەگای مەكتەبی سیاسی لە شاری هەولێر پێشوازییان كرد لە مارشاڵ ساميوڵ سامپسۆن گەورە راوێژكاری بەرگریی بەریتانیا بۆ رۆژهەڵاتی ناوەڕاست و باكووری ئەفریقا و ستیفن هیكی باڵیۆزی بەریتانیا لە عیراق و جەیمس سۆرنتن، كونسڵی گشتیی بەریتانیا لە هەرێمی كوردستان و وەفدێكی یاوەریان.

لە دیدارێكدا كە هەریەك لە د.سۆران جەمال تاهیر ئەندامی مەكتەبی سیاسیی یەكێتیی نیشتیمانیی كوردستان و پۆڵاد شێخ جەنگی فەرماندەی هێزەكانی دژە تێرۆر ئامادەی بوون، گفتوگۆ كرا لەبارەی دوایین پێشهات و گۆڕانكارییەكانی تایبەت بەدۆخی سیاسی و ئاڵنگارییە ئەمنییەكان و بەردەوامیی مەترسییەكانی داعش لە عیراق و هەرێمی كوردستان و پتەوكردنی پەیوەندییەكان لەگەڵ بەریتانیا، بە تایبەت لەڕووی هاریكاریی سەربازییەوە.

هاوسەرۆكان بۆچوون و سەرنجی خۆیان لەبارەی شانە نوستووەكانی داعش و جموجۆڵەكانیان و رێوشوێنەكانی رووبەڕووبوونەوەیان خستەڕوو، جەختیشیان لەسەر كاری هاوبەش و پێكەوەیی و هەمئاهەنگیی نێوان هێزەكانی پێشمەرگە و سوپای عیراق كردەوە بەپشتیوانی هێزەكانی هاوپەیمانان بەتایبەتی لە كەركوك و‌ ناوچە دابڕێنراوەكان كە بۆشایی ئەمنییان هەیە.

هاوسەرۆكان ئاماژەیان بۆ گرنگی و پێویستی بەردەوامی هاریكارییە سەربازییەكان و ئەركی هاوپەیمانیی نێودەوڵەتی لە عیراق و هەرێمی كوردستان كردەوە بۆ لەناوبردنی تەواوی چەكدارانی داعش و دوورخستنەوەی مەترسییەكانی تیرۆر و دابینكردنی سەقامگیریی ئەمنی و ئارامی بۆ ناوچەكە.

هاوكات سوپاسی گەل و حكومەتی بەریتانیا و هاوپەیمانیی نێودەوڵەتییان كرد بۆ پێشكەشكردنی یارمەتی و هاوكاری و پێداویستیی سەربازی و پشتیوانییەكانیان بۆ عیراق و هەرێمی كوردستان و بەردەوامی مەشق و راهێنان بە هێزەكانی پێشمەرگە.

لەبارەی چاكسازیی و یەكخستنی هێزەكانی پێشمەرگە، هاوسەرۆكان ئامادەیی و پشتیوانیی سەرۆكایەتیی یەكێتیی نیشتیمانیی كوردستانیان دووپاتكردەوە بەوجۆرەی كە بنەمای یەكسانی و هاوسەنگی تێدا رەچاو بكرێت، خواستی یەكێتییان خستەڕوو بۆ بوونی یەك هێزی پێشمەرگە كە دوور بێت لە هەموو دەستوەردانێك و هەرێمی كوردستانیش ببێت بەخاوەن هێزێكی نیشتیمانیی ڕێكخراو.

لە كۆتایی دیدارەكەدا هەردوولا هاوڕا بوون لەسەر دیاریكردنی پلان و بەرنامەیەكی گونجاو بۆ بەردەوامی كاری پێكەوەیی بۆ لەناوبردنی یەكجاریی شانە نوستووەكانی چەكدارانی داعش.

وەفدی میوانیش سوپاسی رۆڵ و قارەمانی و قوربانیدانی هێزەكانی پێشمەرگەیان كرد لە شەڕی روبەڕووبوونەوەی تیرۆردا.

لەبارەی پەیوەندییەكانی هەولێر و بەغداو پێگەی هەرێم لە هاوكێشەكاندا، هاوسەرۆكان جەختیان لە یەكڕیزی نیشتمانی و یەكهەڵوێستی كورد لە بەغدا كردەوەو ئاماژەیان بۆ ئەوەكرد پێكهێنانی هاوپەیمانی كوردستان بۆ هەڵبژاردنەكانی داهاتووی عیراق لەنێوان یەكێتی و بزووتنەوەی گۆڕان دەستپێك و هەنگاوێكی گرنگ بوو بەئاڕاستەی پاراستنی بەرژەوەندییە باڵاكانی گەلی كورد.

PUKmedia