دواین زانیاری له‌باره‌ی گواستنه‌وه‌ی فه‌رمانگه‌ فیدراڵیه‌كان بۆسه‌ر به‌غدا

.

یه‌كێك له‌ مادده‌كانی یاسای بودجه‌ی ئه‌مساڵی عیراق باس له‌ گواستنه‌وه‌ی موچه‌ی فه‌رمانگه‌ فیدراڵیه‌كان هه‌رێم بۆ سه‌ربه‌غدا ده‌كات، كه‌ پێكهاتوون له‌(پاسه‌پۆڕت و نیشینگه‌ و  ره‌گه‌زنامه‌ و كارتی نیشتمانی)، كه‌چی  تاكو ئێستا ئه‌و مادده‌یه‌ جێبه‌جێنه‌كراوه‌و ئه‌ندامێكی په‌رله‌مانی عیراقیش  ئاماژه‌ به‌و ئاسته‌نگانه‌ ده‌كات كه‌ وایكردووه‌ تاكو ئێستا ئه‌و پرسه‌ یه‌كلانكراوه‌ته‌وه‌. 

بڵێسه‌ جه‌بار فه‌رمان ئه‌ندامی لیژنه‌ی پلان و به‌دواداچون له‌ ئه‌نجومه‌نی نوێنه‌ران به‌ PUKmediaی راگه‌یاند: به‌هۆی ئه‌وه‌ی  كارمه‌ندانی فه‌رمانگه‌ فیدراڵیه‌كانی كوردستان ژماره‌یان زۆره‌‌و به‌شێكیان موچه‌كانیان له‌سه‌ر حكومه‌تی هه‌رێمه‌، هه‌ر ئه‌مه‌ش وایكردوه‌ تا ئێستا پرسی گواستنه‌وه‌یان بۆ سه‌ر به‌غدا یه‌كلانه‌كرێته‌وه‌.

وتیشی: ئێمه‌ هه‌وڵمانداوه‌ ئه‌و فه‌رمانبه‌رانه‌ی موچه‌ له‌ هه‌رێم وه‌رده‌گرن بیانخه‌ینه‌ سه‌ر به‌غدا و له‌وێ دابمه‌زرێنه‌وه‌، بۆئه‌مه‌ش ره‌زامه‌ندی حكومه‌تی  فیدراڵ دراوه‌ له‌سه‌ر ئه‌و داواكارییه‌، به‌و هه‌نگاوه‌ ته‌واوی كارمه‌ندانی فه‌رمانگه‌ فیدراڵیه‌كان ده‌چێته‌وه‌ سه‌ر حكومه‌تی عیراقی و راسته‌وخۆ موچه‌ له‌ به‌غداوه‌ وه‌رده‌گرن.

ئاماژه‌ی به‌وه‌شكرد: بۆجێبه‌جێكردنی هه‌موو ئه‌و هه‌نگاوانه‌ پێویستی به‌ هاوكاری و هه‌ماهه‌نگی حكومه‌تی هه‌رێم هه‌یه‌، واتا ره‌زامه‌ندی به‌غدا هه‌یه‌، به‌ڵام پێویستی به‌ره‌زامه‌ندی حكومه‌تی هه‌رێم هه‌یه‌، بۆئه‌وه‌ی  پرسی فه‌رمانگه‌كانی (پاسه‌پۆڕت و نیشینگه‌ و  ره‌گه‌زنامه‌ و كارتی نیشتمانی) له‌نێوان هه‌رێم و به‌غدا یه‌كلابكرێته‌وه‌.

هه‌رله‌وباره‌یه‌وه‌ PUKmedia په‌یوندی به‌ سامی جه‌لال به‌رێوه‌به‌ری گشتی له‌وه‌زاره‌تی ناوخۆی حكومه‌تی هه‌رێم كرد كه‌چی ناوبراو  ئاماده‌نه‌بوو له‌و باره‌یه‌وه‌  قسه‌ بكات، هاوكات عه‌بدولناسڕ ئه‌حمه‌د  ئه‌ندامی لیژنه‌ی ناوخۆی په‌رله‌مانی كوردستان گواستنه‌وه‌ی فه‌رمانبه‌رانی فه‌رمانگه‌ فیدراڵیه‌كان بۆ سه‌ر به‌غدا به‌باش ده‌زانێ بۆ PUKmedia  وتی: رۆژانه‌ له‌لایه‌ن به‌شێك له‌كارمه‌ندانی ئه‌و فه‌رمانگانه‌ په‌یوه‌ندیمان پێوه‌ده‌كرێت و داوا ده‌كه‌ن موچه‌كانیان بچێته‌ سه‌ر به‌غدا كه‌چی ئه‌وه‌ یه‌كلانه‌كراوه‌ته‌وه‌.

وتیشی: له‌ماوه‌ی رابردوو موچه‌ی ئه‌و كارمه‌ندانه‌ هاوشێوه‌ی موچه‌خۆرانی هه‌رێم به‌ لێبڕین دابه‌شده‌كرا، له‌كاتێكدا ئه‌وان موچه‌كانیان له‌ حكومه‌تی عیراقه‌وه‌ دێت، هه‌ربۆیه‌ به‌هه‌وڵی په‌رله‌مان له‌ماوه‌ی رابردوو جیاوازی دوومانگی لێبڕینه‌كه‌یان بۆگه‌رایه‌وه‌.

ئه‌و په‌رله‌مانتاره‌ پێشیوابوو: گواستنه‌وه‌ی موچه‌ی  كارمه‌ندانی فه‌رمانگه‌ فیدراڵیه‌كان هیچ زیانێك به‌ وه‌زاره‌تی ناوخۆ یان حكومه‌تی هه‌رێم به‌ گشتی ناگه‌یه‌نێت، چونكه‌ نه‌وه‌ك موچه‌ی ئه‌و كارمه‌ندانه‌ به‌ڵكو موچه‌ی هه‌موو هه‌رێمی كوردستان به‌ گوێره‌ی یاسای بودجه‌ له‌ به‌غداوه‌ دێت، بۆیه‌ من هیچ مه‌ترسیه‌ك له‌سه‌ر گواستنه‌وه‌یان بۆ به‌غدا نابینم.

PUKmedia ته‌ها عه‌بدوڵڵا/ هه‌ولێر