یاساناسێك: لیژنه‌ی لێكۆڵینه‌وه‌ له‌ روداوه‌كه‌ی ئیبن خه‌تیب كارگێرییه‌ نه‌ك سزایی

.

شاره‌زایه‌كی بواری یاسا، ئه‌مڕۆ یه‌كشه‌ممه‌ 2ی ئایاری 2021 جه‌ختیكرده‌وه‌ به‌گوێره‌ی ده‌قه‌ یاساییه‌كان، ئه‌وانه‌ی له‌كاروباره‌ كارگێڕییه‌كان و به‌جێهێنانی كاره‌كانیاندا كه‌مته‌رخه‌م ده‌بن، سزای پێبژاردن و تاوه‌كو 3 ساڵ زیندانی ده‌یانگرێته‌وه‌.

له‌تۆڕه‌ كۆمه‌ڵایه‌تییه‌كاندا، چالاكوانان باسیان له‌وه‌ كردووه‌ ئه‌و لیژنه‌یه‌ی بۆ لێكۆڵینه‌وه‌ له‌رووداوی كاره‌ساته‌كه‌ی نه‌خۆشخانه‌ی ئیبن خه‌تیب پێكهێنراوه‌ رایسپاردووه‌ وه‌زیری ته‌ندروستی و به‌ڕێوه‌به‌ری گشتی ته‌ندروستی ره‌سافه‌ له‌كاره‌كانیان دووربخرێنه‌وه‌و ته‌واوی به‌رپرسیارێتی رووداوه‌كه‌ش بخرێته‌ ئه‌ستۆیان.
له‌مباره‌یه‌وه‌، جه‌مال ئه‌لئه‌سه‌دی، شاره‌زای بواری یاسا، ئه‌مڕۆ یه‌كشه‌ممه‌، له‌میانی لێدوانێكی تایبه‌تدا له‌گه‌ڵ PUKmedia رایگه‌یاند: ئه‌ركه‌كانی ئه‌و لیژنه‌یه‌ی بۆ لێكۆڵینه‌وه‌ له‌باره‌ی رووداوه‌كه‌ پێكهێنراوه‌ بریتیه‌ له‌ ده‌ستنیشانكردنی ئه‌و لایه‌نه‌ی له‌  به‌جێهێنانی ئه‌ركه‌كان كه‌مته‌رخه‌م بووه‌.

ئه‌سه‌دی راشیگه‌یاند: له‌ده‌قی یاساكاندا سزاكان دیاریكراون كه‌ خۆی له‌پێبژاردن تاوه‌كو 3 ساڵ زیندانی ده‌بینێته‌وه‌، ئه‌وه‌ش دادگایه‌ كه‌ بڕیار له‌سه‌ر بڕی پێبژاردنه‌كه‌ ده‌دات.

شاره‌زاكه‌ی بواری یاسا ئاماژه‌ی به‌وه‌شدا ئه‌و لیژنه‌یه‌ی پێكهێنراوه‌ لیژنه‌یه‌كی ئیدارییه‌ نه‌وه‌ك لیژنه‌ی سزایی بێت، ئه‌ركی لیژنه‌كه‌ ئه‌وه‌یه‌ ئه‌و لایه‌نه‌ ده‌ستنیشان بكات كه‌ له‌ئه‌ركه‌كانیدا كه‌مته‌رخه‌م بووه‌، لیژنه‌كه‌ راسپارده‌كانی بۆ سه‌رۆكی ئه‌نجومه‌نی وه‌زیرانی فیدڕاڵ به‌رز ده‌كاته‌وه‌.

وتیشی: ئه‌نجومه‌نی وه‌زیران له‌ده‌سه‌ڵاتیدا هه‌یه‌ هه‌موو ئه‌وانه‌ دووربخاته‌وه‌ كه‌ له‌پۆستی باڵادان، جه‌ختیشی كرده‌وه‌ دوورخستنه‌وه‌ی ئه‌وانه‌ی له‌پۆستی وه‌زیردان، پێویسته‌ ناوه‌كه‌ی بۆ ئه‌نجومه‌نی نوێنه‌ران به‌رزبكرێته‌وه‌و ئه‌وان ده‌نگ له‌سه‌ر دوورخستنه‌وه‌ی ده‌ده‌ن.

PUKmedia تایبه‌ت