لاهور شێخ جەنگی: پشتیوان و پارێزەری مافی كرێكارانین

.

لە ڕۆژی جیهانیی كرێكارانی جیهاندا لاهور شێخ جەنگی هاوسەرۆكی یەكێتی پەیامێكی بڵاوكردەوە و رایگەیاند، خەبات و تێكۆشانی كرێكاران لە ڕابردوودا فاكتەر و بزوێنەری گۆڕانكاریی و ئاوەدانی و گەشەكردن بووە و ئێمەش لە سەرۆكایەتی یەكێتی خۆمان بە پشتیوان و پارێزەر و داكۆكیكار لە مافە رەواكانی كرێكاران دەزانین.

دەقی پەیامەكە:

پەیامی هاوسەرۆك لاهور شێخ جەنگی لە ڕۆژی جیهانیی كرێكاراندا

لە ڕۆژی جیهانیی كرێكارانی جیهان بە گەرمی پیرۆزبایی لە سەرجەم كرێكارانی كوردستان و عێراق و جیهان دەكەین.

كرێكاران توێژێكی گرنگ و زیندووی بەرهەمهێنی كۆمەڵگەن، بە بیر و بازوویان كار بۆ بونیادنانی داهاتوویەكی گەش و پەرەسەندو دەكەن، خەبات و تێكۆشانی كرێكاران لە ڕابردوودا فاكتەر و بزوێنەری گۆڕانكاریی و ئاوەدانی و گەشەكردن بووە.

لەم بۆنەیەدا، دووپاتی دەكەینەوە كە دەبێت ژیان و گوزەرانی كرێكارانی كوردستان باش بكرێت، داخوازی و مافە یاسایی و ئاساییەكانیان بۆ دەستەبەر بكرێت.

لە سۆنگەی باوەڕبوونی نەگۆڕمان بە خەباتی كرێكاران و ڕەنجدەرانی بیر و بازووی كوردستان، ئێمە لە سەرۆكایەتیی یەكێتیی نیشتیمانیی كوردستان خۆمان بە پشتیوان و پارێزەر و داكۆكیكار لە مافە ڕەواكانیان دەزانین و كار بۆ بەدیهێنانیان دەكەین، هەر لەو پێناوەشدا یەكێتیی سوور بوو لەسەر ڕێككەوتنی هەرێم و بەغدا و جەختی لەو ڕێككەوتنە دەكردەوە و كاری زۆری بۆ كرد لە پێناو دابینكردنی ژیان و گوزەرانێكی شایستە بۆ هاووڵاتییان و كرێكارانی هەرێم و زامنكردنی مووچەی مووچەخۆران.

داواش دەكەین لە چوارچێوەی یاسایەكی گونجاو كە شایستە و هاوتەریب بێت لەگەڵ داخوازیی كرێكاران، مافەكانیان بەدیبهێنرێت، خوازیاریشین كە كرێكاران و ڕەنجدەران و جوتیاران پێكەوە كۆڵنەدەن و درێژە بە خەباتی مەدەنی و دیموكراسیی خۆیان بدەن لە پێناو بەدیهێنانی تەواوی مافە پیشەییەكانیان.

‏‎پێویستە حكومەت و لایەنە پەیوەندیدارەكانیش بە بایەخەوە لە ڕۆڵ و گرنگیی ئەم توێژە گرنگ و كاریگەرەی كۆمەڵگە بڕوانن و هەوڵی جددی بدەن بۆ باشتركردنی گوزەران و ڕەخساندنی زیاتری دەرفەتی كار و خزمەتگوزاری و مافەكانیان.

دووبارە پیرۆز بێت ١ـی ئایار، ڕۆژی جیهانیی كرێكاران

PUKmedia تایبەت