وتەبێژ: كۆبونەوەنەكانی سەرۆك كۆمار لەهەولێر ئەرێنی بوون

.

سەرۆك كۆماری عیراق لەسەردانەكەی ئەمڕۆیدا بۆ شاری هەولێر چەند كۆبونەوەیەكی لەگەڵ كەسی یەكەمی لایەنە سیاسیەكانی هەرێمی كوردستان ئەنجامدا.

حەسەن جیهاد سەبارەت بە سەردانی سەرۆك كۆماری عیراق بۆ شاری هەولێر رایگەیاند:" بەرێز د بەرهەم ساڵح سەرۆك كۆماری عیراق سەردانی هەولێری كرد و لەگەڵ مەسعود بارزانی و  نێچیرڤان بارزانی سەرۆكی هەرێمی كوردستان  و مەسرور بارزانی سەرۆكی حكومەتی هەرێم  و قوباد تاڵەبانی جێگری سەرۆكی حكومەتی هەرێم كۆبوەوە.

حەسەن جیهاد وتەبێژی  سەرۆك كۆماری عیراق وتیشی: لەو كۆبوونەوانەدا دوا پێشهات و گۆڕانكاریەكانی گۆڕەپانی سیاسی عیراق و هەرێمی كوردستان گفتوگۆیان لەبارەوە كرا و تەئكید لە یەكخستنی هەوڵ و تواناكان كرا بەئاراستەی چارەسەركردنی كێشەو ناكۆكیەكان و هێنانەدی یەكڕیزی نیشتمانی كە خزمەتی سەرجەم عیراق و هەرێمی كوردستان بكات.

لە درێژەی لێدوانەكەیدا حەسەن جیهاد ئاماژەی بەوەشدا:" لە كۆبوونەوانەدا باس لە هەڵبژاردنی پێشوەختەی ئەنجومەنی نوێنەرانی عیراق كرا بەجۆرێك ببێتەدەرفەتێك بۆ چارەسەری قەیرانی حوكمڕانی و تێپەڕاندنی ئەم دۆخە نەخوازراوەی ئێستا و گەراندنەوەی متمانەی خەڵك بە سندوقەكانی دەنگدان.

هەر سەبارەت بەو سەردانە وتەبێژی سەرۆك كۆماری عیراق ئاماژەی بەوەكرد كە كۆبوونەوەكان لە كەشێكی دۆستانەدا‌ بەڕێوەچوون و تیایاندا باس لە میكانیزمی چارەسەری كێشەكان كرا بەگوێرەی دەستور و بەرژەوەندی هاوبەشی سەرجەم پێكهاتەكانی عیراق بەپشتبەستن بە دیالۆگ و لێكگەیشتن .

حەسەن جیهاد باسی لەوەش كرد كە سەرۆك كۆمار سەردانی مامۆستا سەلاحەدین بەهائەدین و مامۆستا عەلی باپیر و مەكتەبی سیاسی یەكێتی و پارتی كرد لەو دیدارانە باس لە پێویستی هێنانەدی یەكریزی نیشتمانی و چارەسەری ناكۆكیەكان و یەكخستنی هەڵوێستی لایەنەكان  كرا بۆ رووبەروبوونەوەی ئەگەرو پێشهاتەكان.

PUKmedia  تایبەت