لاهور شێخ جەنگی:كۆتایی بەگرتن و ئەشكەنجەدانی رۆژنامەنوسان بهێنرێت

.

هاوسەرۆكی یەكێتی لەیادی رۆژنامەگەری كوریدا رایگەیاند: لەسەرۆكایەتی یەكێتی پشتیوانیی هەموو ئەو میدیاو رۆژنامەنوس و دەنگەئازاو ئازادانەین كە لە چوارچێوەی یاساو ئیتیكی كاری راگەیاندندا پیشەییانە ووماڵی روداو و زانیارییەكان دەكەن، داواش دەكەین لە هەرێم كۆتایی بەگرتن و ئەشكەنجەدانی رۆژنامەنووسان بهێنرێت و ژینگەیەكی گونجاوتر بۆ كاركردنیان بۆ فەراهەم بكرێت. 

لە یادی ڕۆژنامەگەریی كوردی و تێپەڕبوونی ١٢٣ ساڵ بەسەر دەرچوونی یەكەم ژمارەی ڕۆژنامەی كوردستان وەك یەكەمین ڕۆژنامەی كوردی، پیرۆزباییەكی گەرم ئاڕاستەی سەرجەم ڕۆژنامەنووسان دەكەم، هیوادارم كاروانی ڕاگەیاندنی كوردی بەردەوام لە گەشەسەندن و پێشكەوتندا بێت.

ڕاگەیاندنی كوردی لەڕابردوودا سەرباری ئەركە نەتەوەیی و نیشتیمانییەكەی،‌ سەكۆیەكی بوێری ئازادی ڕادەڕبرین بووە، لە ئێستاشدا ڕۆڵێكی گرنگ و دیاری هەیە لە گەیاندنی پەیام و زانیارییەكان و دەستنیشانكردنی كەموكورتی و نادادییەكان و درووستكردنی ڕایگشتی. 

ئێمە لە سەرۆكایەتیی یەكێتیی نیشتیمانیی كوردستان دووپاتی دەكەینەوە كە پشتیوانیی هەموو ئەو میدیاو ڕۆژنامەنووس و دەنگەئازا و ئازادانەین كە لە چوارچێوەی یاسا و ئیتیكی كاری ڕاگەیاندندا پیشەییانە ڕووماڵی ڕووداو و زانیارییەكان دەكەن و ئەركی میدیایی خۆیان جێبەجێ دەكەن، لە هەمان كاتیشدا داوا دەكەین لە هەرێمی كوردستان كۆتایی بەگرتن و ئەشكەنجەدانی ڕۆژنامەنووسان بهێنرێت و ژینگەیەكی گونجاوتر بۆ كاركردنیان بۆ فەراهەم بكرێت. 

درود بۆ گیانی هەموو ئەو رۆژنامەنووسانەی كە لە پێناوی ئازادیی و پێشكەوتن و دیموكراسیی و گەیاندنی راستیدا شەهیدبوون.

لاهور شێخ جەنگی

هاوسەرۆكی یەكێتییی نیشتیمانیی كوردستان