ژن و مێردێك گیانیانلەدەستداو منداڵەكانیشیان بریندارن

.

لەرووداوێكی هاتووچۆدا لە نزیك گوندی هیزۆپ لەئیدارەی راپەڕین ژن و مێردێك گیانیان لەدەستداو دوو منداڵیشیان بەسەختی بریندار بوون.

نەقیب عەلی عەبدوڵڵا وتەبێژی بەڕێوەبەرایەتی هاتووچۆی راپەڕین لەبارەی رووداوەكەوە بە PUKmediaی راگەیاند: بەیانی ئەمڕۆ 16ی 4ی 2021 رووداوێكی پێكدادانی هاتووچۆ لەنزیك گوندی هیزۆپ لەسنوری ئیدارەی راپەڕین لەنێوان نیسان سەنییەكی تایبەت و بارهەڵگرێكدا كە لەجۆری مارسیدس بووە روویداوە.

وتیشی: بەهۆی رووداوەكەوە ژن و مێردێك گیانیان لەدەستداوەو دوو منداڵیشیان كە تەمەنیان 2 ساڵ و 9 ساڵ بووە بەسەختی بریندار بوون و بۆ چارەسەركردن رەوانەی نەخۆشخانە كراون.

وتەبێژی هاتووچۆی راپەڕین باسی لەوەشكرد ماڵی باوكی ژنەكە لەچوارقوڕنەیەو پیاوەكەش خەڵكی هەولێر بووەو بەسەردان لەچوار قوڕنە بوون و لەكاتی گەڕانەوەیان بۆ ماڵی خۆیان كە لەهەولێر نیشتەجێبوون رووداوەكە رویداوە.

ئەوەشی خستەڕوو كە ئەفسەری ئێشكگریان چوەتە شوێنی رووداوەكەو هێڵكاری بۆ كردوەو پەڕاوی لێكۆڵینەوەش بۆ رووداوەكە كراوەتەوە.

PUKmedia تایبەت