عیراق.. هۆشداریی لەداڕمانی سیستمی تەندروستی دەدرێت

.

وەزارەتی تەندروستی و ژینگەی فیدڕاڵی، ئەمڕۆ سێشەممە 13ی نیسانی 2021 هۆشداریدا لەوەی بەردەوامبوونی بەهەند وەرنەگرتنی رێنماییە خۆپارێزەكان و گوێنەدان بەبڕیارەكانی لیژنەی باڵای تەندروستی و سەلامەتی نیشتمانیی.

وەزارەتی تەندروستی لەڕاگەیەنراوێكدا بڵاویشی كردەوە: وەزارەتی تەندروستی و ژینگەی فیدڕاڵی وێرای پیرۆزبایكردن لەگەلی عیراق بەبۆنەی هاتنەوەی مانگی رەمەزانی پیرۆز، داواش لەهاووڵاتیان دەكات سوود لەم مانگە پیرۆزەو بەها مرۆڤایەتیی و روحییەكانی وەربگرن و پابەند بن بە رێكارو رێنماییەكانی لیژنەی باڵای تەندروستی و سەلامەتی نیشتمانیی و سەرجەم دامودەزگا تەندروستییە رەسمییەكان و رێگریكردن لەبڵاوبوونەوەی پەتاكە، كە لەم رۆژانەی دواییدا دۆخی پەتاكە پەرەسەندنی مەترسیداری بەخۆوە بینیوەو ژمارەی توشبوون بەرێژەیەكی بەرچاو رووی لەبەرزبوونەوە كردووە.

لەڕاگەیەنراوەكەدا هاتووشە: لەسەرەتای بڵاوبوونەوەی پەتاكەوە، هەفتەی رابردوودا بەهەفتەیەك دادەنرێت كە بەرزترین ژمارەی توشبوون تێدا تۆماركراو ژمارەی توشبوون گەیشتە 51هەزارو 387 كەس و 250 كەسیش گیانیان لەدەستدا، هۆكاری راستەوخۆش  بەردەوامی ئەو كۆبوونەوە و قەرەباڵغییانە كە هاووڵاتیان لەشوێنە گشتی و تایبەتەكان دروستیان كردووە، هەروەها پابەندنەبوون بە بەستنی دەمام.

بەگوێرەی راگەیەنراوەكە، بەهەند وەرنەگرتنی بەردەوامی رێكارە خۆپارێزییەكان و گوێنەدان بەبڕیارەكانی لیژنەی باڵای تەندروستی و سەلامەتی نیشتمانیی و ئامارە دووبارەكانی وەزارەتی تەندروستی، هۆكار بوون بۆ ئەوەی حاڵەتەكانی توشبوون و گیانلەدەستدان بەڤایرۆسەكە بەردەوام بێت و ببێتە هەڕەشە لەسەر سیستمی تەندروستی نیشتمانیی، ژمارەی توشبوون بەشێوەیەك بەرزبێتەوە كە لەسەرووی توانای وەرگرتن و مامەڵەكردنی دامودەزگاكانی تەندروستییەكاندا بێت.

لەراگەیەنراوەكەی وەزارەتی تەندروستیدا هاتووشە: سەرجەم شارەزایانی بواری تەندروستی گشتی و لێكۆڵینەوە زانستییە سەنگینەكان جەختیان لەسەر ئەوە كردۆتەوە كەتاكە رێگا بۆ زاڵبوون بەسەر پەتاكەو گەڕانەوەی ژیان بۆ دۆخی سروشتی، پێویستە بەشێكی زۆری هاووڵاتی ڤاكسینەكە وەربگرن و بەشێوەیەك نزیكەی لە 70%-80%ی كۆمەڵگە بەرگری لەدژی ڤایرۆسی كۆرۆنا پەیدا بكەن، هاوكات وەزارەتی تەندروستی جەختیش لەبوونی هەموو جۆرە ڤاكسینێك لەدامەزراوە تەندروستییەكان دەكاتەوە كە بۆ هاووڵاتیانیان دابین كردووە، هەموو ڤاكسینەكان لەجۆری كاریگەرن و جێی دڵنیایین و لەلایەن دەزگا ناسراوە زانستییەكانی جیهان و رێكخراوی تەندروستی جیهانییەوە پیشتی پشتی پێبەستراوە، وەزارەتی تەندروستی داوا لەهاووڵاتیان دەكات پەلە بكەن لەوەرگرتنی ڤاكسین، ژمارەیەك مەڵبەندی تەندروستی بۆ ئەو مەبەستە دەستنیشان كراون و ڤاكسینەكەش لەسەرجەم نەخۆشخانەو مەڵبەندە تەندروستییەكاندا دابین كراوە.

هاوكات راگەیەنراوەكە جەختیش دەكاتەوە لەرۆڵی گرنگی دەزگاكانی راگەیاندن و دامەزراوە حكومی و ناحكومییەكان و كەرتی تایبەت تاوەكو هەوڵی زیاتربخەنە گەڕ بۆ هاندانی هاووڵاتیان بەمەبەستی پابەندبوون بە رێكارە خۆپارێزەكان و سەردانیكردنی دامەزراوە تەندروستییەكان بۆ وەرگرتنی ڤاكسین.

PUKmedia راگەیاندنی وەزارەتی تەندروستی