له‌به‌رژه‌وه‌ندی پێشمه‌رگه‌ هه‌وڵی هه‌مواركردنه‌وه‌ی یاسای شه‌هیدان ده‌درێت

.

بۆئه‌وه‌ی ئه‌و پێشمه‌رگانه‌ به‌شه‌هید هه‌ژماربكرێن كه‌ له‌كاتی ئه‌ركه‌كانی به‌ كاره‌سات و رووداوی نه‌خوارو گیان له‌ ده‌ستده‌ده‌ن، لیژنه‌ی پێشمه‌رگه‌ی په‌رله‌مانی كوردستان له‌هه‌وڵی ئاماده‌كردنی پڕۆژه‌یه‌كه‌ بۆ هه‌مواركردنه‌وه‌ی یاسای وه‌زاره‌تی كاروباری شه‌هیدان‌و ئه‌نفالكراوه‌كان.

عوسمان سێده‌ری جێگری سه‌رۆكی لیژنه‌ی پێشمه‌رگه‌ له‌په‌رله‌مانی كوردستان به‌ PUKmedia ی راگه‌یاند: وه‌ك لیژنه‌ی پێشمه‌رگه‌ له‌په‌رله‌مانی كوردستان له‌هه‌وڵداین هه‌موو ئه‌و پێشمه‌رگانه‌ی به‌هۆی كاره‌سات‌و رووداوی نه‌خوازراو له‌كاتی ئه‌ركه‌كه‌ی گیانله‌ده‌ست داوه‌ به‌ شه‌هید هه‌ژمار بكرێن.

وتیشی: بۆ ئه‌و مه‌به‌سته‌ وه‌ك لیژنه‌ی پێشمه‌رگه‌ له‌ماوه‌ی چه‌ند رۆژی رابردوودا گفتوگۆی جددیمان له‌گه‌ڵ ئه‌نجومه‌نی وه‌زیران و سه‌رۆكایه‌تی هه‌رێم كردوه‌ تاكو بتوانین پرۆژه‌یاسایه‌ك بۆ هه‌مواركردنه‌وه‌ی یاسای وه‌زاره‌تی كاروباری شه‌هیدان و ئه‌نفالكراوه‌كانی هه‌رێمی كوردستان ئاماده‌ بكه‌ین.

جێگری سه‌رۆكی  لیژنه‌ی پێشمه‌رگه‌ له‌ په‌رله‌مان ئاماژه‌ی به‌وه‌شكرد: چه‌ندین پێشمه‌رگه‌ هه‌یه‌ به‌كاره‌سات گیانیان له‌ده‌ستداوه‌،  هه‌ندێكیان ئه‌وانه‌ن له‌كاتی گه‌ڕانه‌وه‌یان له‌سه‌نگه‌ره‌كانی پێشمه‌رگه‌ له‌شه‌ڕی داعش توشی رووداوی نه‌خوزارو بوون و گیانیان له‌ده‌ستداوه‌، كه‌چی به‌گوێره‌ی یاساكه‌ی ئێستا مووچه‌كه‌ی ده‌بڕێت و هیچ  بۆ خێزانه‌كه‌ی ناكرێت.

ئه‌وه‌شی خسته‌ڕوو: له‌كاتی  هه‌مواركردنه‌وه‌ی یاسای وه‌زاره‌تی كاروباری شه‌هیدان و ئه‌نفالكراوه‌كان ئه‌و پێشمه‌رگانه‌ی له‌ ئه‌ركه‌كانیدان و به‌كاره‌سات و روودای  نه‌خوازراو گیان له‌ده‌ستده‌ده‌ن، به‌شه‌هید هه‌ژمار ده‌كرێن، له‌گه‌ڵ چاره‌سه‌ركردنی چه‌ندین كێشه‌و گرفتی دیكه‌ی وارسی شه‌هیدان هه‌وڵده‌درێت له‌چوارچێوه‌ی هه‌مواركردنی یاساكه‌ چاره‌سه‌ر بكرێن.

PUKmedia ته‌ها عه‌بدوڵڵا / هه‌ولێر