سه‌رۆك كۆمار بودجه‌ی گشتی په‌سه‌ندكرد

.

سه‌رۆك كۆمار: جه‌ختیكرده‌وه‌ له‌پێویستی جێبه‌جێكردنی بڕگه‌كانی یاساكه‌ به‌وجۆره‌ی په‌رژه‌وه‌ندی سه‌رجه‌م ھاووڵاتیان بپارێزێت و پشتیوانی چاكسازی دارایی و به‌گژاچوونه‌وه‌ی گه‌نده‌ڵی بكات.
د. به‌رهه‌م ساڵح، سه‌رۆك كۆماری عیراق ئه‌مڕۆ پێنجشه‌ممه‌ 8-4-2021، یاسای بودجه‌ی گشتی بۆ ساڵی 2021 ی په‌سه‌ندكرد.

له‌میانی ئیمزاكردنی یاساكه‌دا سه‌رۆك كۆمار جه‌ختیكرده‌وه‌ په‌سه‌ندكردنی یاساكه‌ بۆ زامنكردنی پێداویستییه‌ گرنگه‌كانی خه‌ڵكه‌، هه‌روه‌ها بۆ دابینكردنی شایسته‌ داراییه‌كانی گشت مووچه‌خۆران و خانه‌نشینانی عیراق و ھه‌رێمی كوردستان و خه‌رجییه‌ پێویستییه‌كانی حكومه‌ته‌، به‌جۆرێك دادپه‌روه‌ری كۆمه‌ڵایه‌تی بۆ ته‌واوی خه‌ڵكی عیراق بھێنێته‌دی.

سه‌رۆك كۆمار دووپاتیكرده‌وه‌ له‌پێویستی جێبه‌جێكردنی چاكسازی دارایی و ئابووری و پشتیوانیكردن له‌ كه‌رته‌ ئابوورییه‌ جیاوازه‌كان، تاوه‌كو پشتیوانی بكات له‌ گه‌شه‌پێدان و پێشكه‌وتنی وڵاتدا.

 ھاوكات سه‌رۆك به‌رھه‌م ئاماژه‌ی به‌وه‌كرد، په‌سه‌ندكردنی بودجه‌ی گشتی هه‌نگاوێكی گرنگه‌ به‌ ئاڕاسته‌ی پاراستنی مافه‌ ره‌واكانی خه‌ڵك و مووچه‌خۆران، ھه‌روه‌ھا جه‌ختیكرده‌وه‌ له‌ پشتیوانی رۆڵی ده‌زگا په‌یوه‌ندیداره‌كان بۆ جێبه‌جێكردنی بڕگه‌كانی بودجه‌ی گشتی و یه‌كخستنی هه‌وڵی ھه‌مووان به‌ ئاڕاسته‌ی ھێنانه‌دی پێداویستییه‌ گرنگه‌كانی هاووڵاتیان و بونیادنانه‌وه‌ی عیراق و گرتنه‌به‌ری باشترین رێوشوێن بۆ پشتیوانی له‌ توێژی كه‌مده‌رامه‌ته‌كان و ره‌خساندنی ده‌رفه‌ری كار بۆ گه‌نجان و درێژه‌دان به‌ چاكسازی و به‌گژاچوونه‌وه‌ی گه‌نده‌ڵی.

په‌سه‌ندكردنی بودجه‌ی گشتی له‌لایه‌ن سه‌رۆك كۆمار دوای ئه‌وه‌ دێت كه‌ یاساكه‌ له‌ ئه‌نجومه‌نی نوێنه‌رانه‌وه‌ گه‌یشته‌ سه‌رۆكایه‌تی كۆمار، پاش ئه‌وه‌ی ده‌نگی له‌سه‌ر درابوو له‌ ئه‌نجومه‌نی نوێنه‌ران.

PUKmedia