داوای جیاكردنه‌وه‌ی پاره‌ی په‌ره‌پێدانی پارێزگاكانی هه‌رێم ده‌كرێت

.

ئه‌ندامێكی ئه‌نجومه‌نی نوێنه‌ران رایده‌گه‌یه‌نێت، له‌چوارچێوه‌ی بودجه‌ی گشتی عیراق،  بودجه‌ی په‌ره‌پێدان بۆ سه‌رجه‌م پارێزگاكانی عیراق به‌ هه‌رێمی كوردستانه‌وه‌ دیاریكراوه‌، هاوكات  میكانیزمی خه‌رجكردنی ئه‌و بودجه‌یه‌ ئاشكراده‌كات، له‌لایه‌نخۆیه‌وه‌ ئه‌ندامێكی ئه‌نجومه‌نی پارێزگای هه‌ولێر به‌باشی ده‌زانی بودجه‌ی ئه‌و ئه‌نجومه‌نانه‌ هاوشێوه‌ی پارێزگاكانی دیكه‌ی عیراق خه‌رجبكرێت‌ و نه‌خرێته‌  نێو ناكۆكی دارایی و ئابورییه‌كانی نێوان هه‌رێم و به‌غدا.

د. جه‌مال كۆچه‌ر ئه‌ندامی لیژنه‌ی دارایی ئه‌نجومه‌نی نوێنه‌ران تایبه‌ت به‌ PUKmedia ی راگه‌یاند: له‌چوارچێوه‌ی بودجه‌ی گشتی عیراق كه‌ له‌ كۆتایی مانگی رابردوو له‌ په‌رله‌مان ده‌نگی له‌سه‌ر دراوه‌، بودجه‌ی په‌ره‌پێدان بۆ سه‌رجه‌م پارێزگاكانی عیراق به‌ هه‌رێمی كوردستانه‌وه‌ دیاریكراوه‌.

وتیشی: له‌به‌ر ئه‌وه‌ی پرسی دارایی هه‌رێم له‌گه‌ڵ به‌غدا یه‌ك پاكێجه‌ ناردنی بودجه‌ی په‌ره‌پێدانی سێ پارێزگاكه‌ی هه‌رێم له‌چوارچێوه‌ی بودجه‌ی گشتی ده‌بێت نه‌وه‌ك به‌جیا.

له‌لایه‌ن خۆیه‌وه‌ دلێر حسێن ئه‌ندامی ئه‌نجومه‌نی پارێزگای هه‌ولێر سه‌باره‌ت به‌و پرسه‌ بۆ PUKmedia وتی: هه‌نگاوێكی باشه‌ ئه‌مساڵ بودجه‌ بۆ په‌ره‌پێدانی پارێزگاكان له‌ په‌رله‌مانی عیراق  ده‌نگی له‌سه‌ر درا، به‌ڵام باشتر بوو هاوشێوه‌ی پارێزگاكانی دیكه‌ی عیراق  بودجه‌ی په‌ره‌پێدانی سێ  پارێزگاكه‌ی هه‌ولێر و دهۆك و سلێمانی جیابكرێته‌وه‌ له‌ بودجه‌ی گشتی  كوردستان و نه‌خرێته‌ نێو ململانێی نێوان هه‌رێم و به‌غدا. وتیشی: دابینكردنی بودجه‌ بۆ پارێزگاكان هه‌نگاوێكی باش ده‌بێت بۆ ده‌ستپێكردنه‌وه‌ی پڕۆژه‌كان وچاره‌سه‌ركردنی ئه‌و گرفتانه‌ی به‌هۆی نه‌بوونی بودجه‌وه‌ سه‌ری هه‌ڵداوه‌ .

PUKmedia ته‌ها عه‌بدوڵڵا / هه‌ولێر