ئه‌مڕۆ 21 ساڵ به‌سه‌ر كۆچی دوایی مامۆستای خه‌باتی سیاسی، كوردایه‌تی، رووناكبیری و رۆژنامه‌گه‌ری، مامۆستا ئیبراھیم ئه‌حمه‌د تێپه‌ڕده‌بێت و به‌و بۆنه‌خه‌مناكه‌شه‌وه‌ بافڵ تاڵه‌بانی په‌یامێكی بڵاوكرده‌وه‌.

ده‌قی په‌یامه‌كه‌...

مامۆستا ئیبراھیم ئه‌حمه‌د یه‌كێكه‌ له‌ سیمبوله‌كانی سیاسه‌ت، نیشتمانپه‌روه‌ری، رۆشنبیری و رۆژنامه‌گه‌ری كوردستان له‌ سه‌ده‌ی رابردوودا. سیاسییه‌كی بیرتیژ و دووربین، قه‌ڵه‌مێكی پڕ له‌ وره‌و رۆشنبیرێكی نوێخوازی میلله‌ته‌كه‌مان بوو. له‌پێناو كوردستان و سه‌ربه‌رزی خه‌ڵكه‌كه‌ی ده‌ژیا.

مامۆستا ئیبراهیم ئه‌حمه‌د له‌ ژیانی سیاسیی خۆیدا بڕوای به‌ بیری نه‌ته‌وه‌یی و نوێگه‌ری هه‌بوو. هه‌ر ئه‌مه‌ش وایكرد كاتێك به‌ سكرتێری پارتی ھه‌ڵبژێردرا، بناغه‌یه‌كی نوێی بۆ حیزبایه‌تی دانا و رۆحێكی نوێی به‌ جووڵانه‌وه‌ی سیاسی و خه‌باتی كوردایه‌تی به‌خشی. ئه‌و رۆحییه‌ته‌ نه‌ته‌وه‌یی و نیشتمانپه‌روه‌رییه‌ی مامۆستا ئیبراهیم ئه‌حمه‌د بوو بووبه‌ هه‌وێنی سیاسه‌تی پارتی و وایكرد كۆمه‌ڵانی خه‌ڵك به‌پیر ئه‌و حیزبه‌وه‌ بچن و پێشوازی لێبكه‌ن. خه‌ڵكی كوردستان به‌ رۆحێكی خۆنه‌ویستی و شۆڕشگێڕانه‌وه‌ پێشوازییان له‌ هه‌وڵه‌كانی مامۆستا ده‌كرد و  وه‌ك رابه‌رێكی نه‌ته‌وه‌یی و نیشتمانپه‌روه‌ری ته‌ماشایان ده‌كرد. ئه‌و بوو بیروبۆچوونه‌ جیاوازه‌كانی كۆده‌كرده‌وه‌ و تۆوی نیشتمانپه‌روه‌ری له‌ رێكخستنه‌كانی حیزب و دڵی خه‌ڵكی كوردستاندا چاند و پارتی دیموكراتی كرده‌ حیزبێكی گه‌وره‌ و كاریگه‌ر له‌ كوردستان.

ئه‌مڕۆ كه‌ یادی ئه‌و ڕابه‌ره‌ نه‌ته‌وه‌ییه‌ی كورد ده‌كه‌ینه‌وه‌، له‌ ھه‌مووكات زیاتر پێویستمان به‌ خه‌بات و بیری نیشتمانی و نوێگه‌ری مامۆستا ئیبراھیم ئه‌حمه‌ده‌ بۆ سیاسه‌ت و حوكمڕانی، پێویستمان به‌و توانا بێسنوور و دونیابینی و رۆشنبیرییه‌ فراوانه‌ی ئه‌وه‌ بۆ یه‌كخستنه‌وه‌ی ھێز و تواناكان بۆ گه‌شه‌پێدانی رۆشنبیری له‌ ھه‌موو كایه‌كانی ژیان. به‌ڵێن دووپاتده‌كه‌ینه‌وه‌ ئێمه‌ به‌ ئه‌مانه‌ته‌وه‌ درێژه‌ی پێده‌ده‌ین و ده‌یبوژێنینه‌وه‌. به‌ شوێنپێی ئه‌ودا ده‌ڕۆین و وانه‌كانی ده‌كه‌ینه‌ چرای ژیانمان.

یاد و یاده‌وه‌ریت ھه‌میشه‌ به‌زیندوویی له‌ دڵماندا ده‌مێنێته‌وه‌ مامۆستای گه‌وره‌
ھه‌زار سڵاو له‌ گیانی پاكی مامۆستا ئیبراھیم ئه‌حمه‌د و شه‌ھیدانی رێگای رزگاری كوردستان.

بافڵ تاڵه‌بانی
هاوسه‌رۆكی یه‌كێتیی نیشتمانیی كوردستان

PUKmedia تایبه‌ت