تیمەكانی بەڕێوبەرایەتی گشتی تەندروستی هەڵەبجە بەردەوامن لە پشكنین و پێدانی ڤاكسین بە تووشبوان و دوو تووشبووی كۆرۆنای نوێش خرانە چاودێری چڕەوە، هاوكات قائیمقامی قەزای ناوەندیی هەڵەبجەش رایگەیاند، كە ڤاكسینی كۆرۆنای وەرگرتووە.

جیهاد عومەر بەڕێوبەری كارگێڕی نەخۆشخانەی وەفا لە لێدوانێكدا بە PUKmedia ی راگەیاند: گرنگە هاوڵاتیان ڤاكسینی كۆرۆنا وەربگرن و بە پێزانینەوە پێشووازی لە تیمەكان بكەن.

وتیشی: لە ئێستادا چوار نەخۆشی تێدایە، دوو لە نەخۆشەكان لە ژوری چاودێری چڕدان و لە ژێر چاودێری تیمە پزیشكییەكاندان.

بەڕێوبەری كارگێڕی نەخۆشخانەی وەفا راشیگەیاند: بۆ ڕێگری لە بڵاوبوونەوە ڤایرۆسەكە پێدانی ڤاكسین بە هاووڵاتیان دەستیپێكردووە، لە ماوەی 24 سەعاتدا لە نەخۆشخانەی وەفا و تیمە گەڕۆكەكان 250 پشكنین وەرگیراوە، 33كەس بە پێی ئامارەكانی وەزارەتی تەندرووستی لەژێر چاودێریدان.

هەر ئەمڕۆش، نوخشە ناسح قائیمقامی قەزای ناوەندیی هەڵەبجە چەند وێنەیەكی خۆی بڵاوكردەوە و رایگەیاند: كە ڤاكسینی كۆڤید 19ی  لە بەرێوەبەرایەتی تەندروستی ھەڵەبجە وەرگرتووە و سوپاسی تیمە تەندروستییەكانیشی كرد.

PUKmedia فەرحان حەمەخان-هەڵەبجە