كه‌ركوك.. هه‌ڵمه‌تێكی خوێن به‌خشین به‌رێوه‌چوو

.

له‌پارێزگای كه‌ركوك ئاماره‌كانی توشبون به‌كۆرۆنا رۆژ له‌دوای رۆژ روو له‌هه‌ڵكشانه‌ و رۆژانه‌ نزیكه‌ی 200 كه‌س توشی ڤایرۆسی كۆرۆنا ده‌بن  و ته‌ندروستی كه‌ركوك ده‌ڵێت به‌هۆی هه‌ڵشانی حاڵه‌ته‌كانه‌وه‌ 42 حاڵه‌تی مه‌ترسیدار به‌و ڤایرۆسه‌ هه‌یه‌ كه‌پێویستیان به‌چاره‌سه‌ری ورد هه‌یه‌ .

له‌و باره‌یه‌وه‌ د.سه‌باح نامیق سه‌رۆكی هۆبه‌ی ته‌ندروستی گشتی له‌فه‌رمانگه‌ی ته‌ندروستی كه‌ركوك له‌ لێدوانێكی رۆژنامه‌نووسیدا رایگه‌یاند: له‌ماوه‌ی چه‌ند هه‌فته‌ی رابردوودا حاڵه‌ته‌كانی توشبون به‌كۆرۆنا له‌كه‌ركوك به‌به‌راورد به‌چه‌ند مانگی رابردوو زیادیكردوه‌.

راشیگه‌یاند: ژماره‌ی توشبوانی كۆرۆنا له‌كه‌ركوك له‌سه‌ره‌تاوه‌ تائێستا 38هه‌زار حاڵه‌تی توشبونی تێپه‌راندوه‌.رونیشی كرده‌وه‌ له‌ئێستادا رۆژانه‌ له‌نێوان 150-200 حاڵه‌تی توشبون به‌كۆرۆنا له‌كه‌ركوك تۆمار ده‌كه‌ین كه‌به‌شی زۆریان باریان جێگیره‌ و پێویست به‌داخڵبوون به‌نه‌خۆشخانه‌ ناكات، به‌ڵام هه‌شیانه‌ ره‌وشی ناجێگیره‌ و ده‌بێت داخڵ بكرێت.

وتیشی: له‌ئێستادا 42 حاڵه‌تی توشبونی مه‌ترسیدار هه‌یه‌ له‌نه‌خۆشخانه‌ی شیفا 14 داخڵكراون و باریان ناجێگیره‌.له‌لایه‌كی دیكه‌وه‌ د.ئه‌حمه‌د مه‌تر به‌رێوه‌به‌ری بانكی خوێنی كه‌ركوك پێی راگه‌یاندین بۆ فریاكه‌وتنی ئه‌و كه‌سانه‌ی كه‌باریان ناجیگیره‌ به‌هۆی كۆرۆناوه‌ رۆژی 6/4/2021 فه‌رمانگه‌ی ته‌ندروستی كه‌ركوك له‌رێی ئێمه‌وه‌ هه‌ڵمه‌تێكی كۆكردنه‌وه‌ی خوێنی له‌كه‌ركوك ئه‌نجامدا.

ئاماژه‌ی به‌وه‌شدا، هه‌ڵمه‌ته‌كه‌ ئامانجی خۆی پێكاوه‌و توانراوه‌ خوێن و پلازما بۆ ئه‌و كه‌سانه‌ دابینبكرێت كه‌به‌هۆی كۆرۆناوه‌ باری ته‌ندروستییان ناجێگیره‌.راشیگه‌یاند دای هه‌ڵمه‌ته‌كه‌ خوێن و پلازماكه‌شمان ره‌وانه‌ی به‌شی بانكی خوێن له‌نه‌خۆشخانه‌ی شیفا14 كردوه‌ بۆ ئه‌وه‌ی به‌پێی پێویستی بۆ نه‌خۆشه‌كان به‌كاربهێنرێت.

PUKmedia