بافڵ تاڵه‌بانی: 6ی نیسان بۆ ئێمه‌ رۆژی وه‌فادارییه‌

.

بافڵ تاڵه‌بانی هاوسه‌رۆكی یه‌كێتیی نیشتمانیی كوردستان له‌ساڵڕۆژی هه‌ڵبژاردنی سه‌رۆك مام جه‌لال وه‌ك یه‌كه‌مین سه‌رۆك كۆماری كورد له‌ مێژووی عیراق په‌یامێك بڵاوده‌كاته‌وه‌و ئاماژه‌ بۆ ئه‌وه‌شده‌كات، و ئێمه‌ش هه‌ڵگری ئه‌و مه‌شخه‌ڵه‌ ده‌بین. دیالۆگ و لێكتێگه‌یشتن ستراتیژی كاركردنمان ده‌بێت و له‌سه‌ر ڕێبازه‌كه‌ی به‌رده‌وام ده‌بین.

ده‌قی په‌یامه‌كه‌ی....
ئه‌مڕۆ 16 ساڵ به‌سه‌ر هه‌ڵبژاردنی سه‌رۆك مام جه‌لال وه‌ك یه‌كه‌مین سه‌رۆك كۆماری كورد له‌ مێژووی عیراق تێده‌په‌ڕێت.
ئێمه‌ به‌ شانازییه‌وه‌ یادی ئه‌و رۆژه‌ پڕ شكۆیه‌ ده‌كه‌ینه‌وه‌. 6ی نیسان بۆ ئێمه‌ رۆژی وه‌فاداری و به‌رده‌وامیمانه‌ بۆ درێژه‌دان به‌ سیاسه‌تی حه‌كیمانه‌ی مام جه‌لال، رۆژی به‌رپرسیارێتیمانه‌ به‌رامبه‌ر نه‌ته‌وه‌كه‌مان و هه‌موو ئه‌و به‌ها و بڕوایانه‌ی مام به‌رگری لێكردوون.
دیموكراسی، ته‌بایی و پێكه‌وه‌ژیان بناغه‌ی سیاسه‌تی مام جه‌لال بووه‌ و ئێمه‌ش هه‌ڵگری ئه‌و مه‌شخه‌ڵه‌ ده‌بین. دیالۆگ و لێكتێگه‌یشتن ستراتیژی كاركردنمان ده‌بێت و له‌سه‌ر ڕێبازه‌كه‌ی به‌رده‌وام ده‌بین.
عیراق به‌ دۆخێكی سه‌ختدا تێده‌په‌ڕێت، نه‌بوونی متمانه‌ له‌نێوان هێز و لایه‌نه‌كان، ئه‌نجامنه‌دانی دیالۆگێكی نیشتمانیی له‌پێناو چاره‌سه‌كردنی كێشه‌كان پێمان ده‌ڵێت هه‌وڵه‌كانی سه‌رۆك مام جه‌لال له‌ ڕابردوودا چه‌ند گرنگ بووه‌. ئه‌و چه‌ترێك بوو بۆ هه‌موو عیراقییه‌كان و به‌ سیاسه‌تی حه‌كیمانه‌ی خۆی هه‌مووانی بۆ مێزی گفتوگۆ بانگهێشت ده‌كرد. هه‌موولایه‌كیش ئه‌م ڕاستییه‌ ده‌زانن و شایه‌تی بۆ هه‌وڵی بێوچانی ئه‌و ده‌ده‌ن له‌پێناو سه‌ركه‌وتنی پرۆسه‌ی سیاسی له‌ عێراق.
سڵاو له‌ رۆحی پاكی سه‌ركرده‌و ڕابه‌رمان مام جه‌لال و سه‌رجه‌م شه‌هیدانی كوردستان.

بافڵ تاڵه‌بانی
هاوسه‌رۆكی یه‌كێتیی نیشتمانیی كوردستان

PUKmedia تایبه‌ت