ئەنجومەنی باڵای دادوەری عیراق كردنەوەی خانەی نوێی داد لەناحیەی گوڵاڵە راگەیاندو خانەكەش لەلایەن حسێن كازم، سەرۆكی دادگای فیدڕاڵی پارێزگای دیالەوە كرایەوە، كە تێیدا ژمارەیەك لە جێگرانی سەرۆكی دادگای تێهەڵچوونەوەی فیدڕاڵی لەپارێزگای دیالەو داواكاری گشتی ئامادەی كردنەوەی بوون.

ئەنجومەنی باڵای دادوەری لەراگەیەنراوێكدا كە وێنەیەكی دەست PUKmedia كەوتووە ئەوەشی خستۆتە ڕوو كە بینای خانەی داد گوڵاڵە لەسەر راسپاردەی ئەنجومەنی باڵای دادوەری بەهاوكاری و كۆمەكی هاووڵاتیانی ناحیەكە دروستكراوەتەوەو، دوای ئەوەی لەلایەن تیرۆرستانی داعشەوە لەكاتی دەستگرتنیان بەسەر ناحیەكەدا تەواو وێرانیان كردبوو.

بەگوێرەی راگەیەنراوەكە، بینا نوێیەكە، جگە لەخانەی داد دادگاكانی بەرایی و كەسێتی و لێكۆڵینەوەشی لەخۆگرتووە.

سەرۆكی دادگای تێهەڵچوونەوەی فیدڕاڵی لەپارێزگای دیالە، لەو بارەیەوە، لەلێدوانێكدا رایگەیاند: ئەنجومەنی باڵای دادوەری ئامانجێتی لەڕێگەی بەكارهێنانی سیستەمی ئەلیكترۆنییەوە خزمەتی دادوەری پێشكەشی هاووڵاتیان بكات و دادگاكان بینای تایبەت بەخۆیان هەبێت و لەئاستی شكۆی دادوەری عیراق و هاووڵاتیاندا بێت.

PUKmedia راگەیاندنی ئەنجومەنی باڵای دادوەری