لەسییەمین ساڵڕۆژی دەرچونی بڕیاری 688ی ئەنجومەنی ئاسایش كە دوای  كۆڕەوەكەی بەهاری 1991ی خەڵكی كوردستان دەرچوو ، ئەندامێكی مەكتەبی سیاسی یەكێتیی نیشتمانیی كوردستان رایدەگەیەنێت بەهۆی دەرچوونی ئەو بڕیارە كە دوای كۆڕەوەكەی خەڵكی كوردستان دەرچوو، چەندین دەستكەوتی تێدابوو ، لەوانە  پارستن لە هێرشەكانی رژێم و گەڕانەوە خەڵكەكە بۆ شارو شارۆچكەكانی كوردستان.

لەو بارەیەوە سەعدی ئەحمەد پیرە ئەندامی مەکتەبی سیاسی یەکێتی بە PUKmedia ی وتی:  بەهۆی ئەوەی بەهاری 1991 ئەو كاتەی خەڵكی لەترسی هێرشی رژێمی بەعس ئاوارە و دەربەدەری سنورەكان بوون و كۆڕەو دروستوبوو ، بەهارێكی سارد و سەرما و سۆڵە بووە خەڵكێكی زۆر لە منداڵ و پیروپەكەوتە بەرگەیان نەگرت و گیانیان لەدەستدا، بۆیە كۆمەڵگای نێودەوڵەتی لە رێگای دەزگاكانی راگەیاندن و چاوی كامێراكانەوە كەوتەكار، ئەمەش وایکرد سەرۆكی ئەو كاتەی ئەمریکا ئەو رووداوە وەك كارەساتێكی مرۆیی سەیربكات و چەندین وەفدی بۆ بەسەركردنەوەی ئاوارە و لێقەوماوان لە سنورەكانی عیراق بنێرێت، هەرئەمەش وایكرد  ئەنجومەنی ئاسایش كۆبێتەوە لە 5/4/1991 بڕیاری 688ی دەربكات.

ئاماژەی بەوەشكرد: بەگوێرەی ئەو بڕیارە لە ئاسمانەوە كوردستانی لە هێرشی رژێمی بەعس پاراست و رێگای بۆ گەڕانەوەی خەڵك بۆ  شارو شارۆچكەكانی خۆیان خۆشكرد،  هەرلە ژێر سایەی ئەو بڕیارە كوردستان بەگژ پاشماوەی هێزەكانی عیراقدا چۆوە، تا مانگی ئۆكتۆبەری هەمان ساڵ ئەو هێزانە لەكوردستان وەدەرنران و دامودەزگاکانیشی لە کوردستان كشاندەوە، پاشان بڕیاری هەڵبژاردندرا و لە  19/5/1992  بەرێوەچوو ، لەئەنجام حكومەت و پەرلەمانی كوردستانی لێهاتە بەرهەم.

سەعدی ئەحمەد پیرە وتیشی: دوای سی ساڵ دەتوانین بڵێین كلیلی هەموو دەرگا داخراوەكان و  دەستكەتەكانی ئەمرۆ لە كوردستان هەمانە بەرهەمی كۆڕەوەكەی خەڵكی كوردستان بوو، لەوانەی بڕیاری 688ی ئەنجومەنی ئاسایش، بەجۆرێك ئەو كارەساتە مرۆییە بە خێرگەڕایەوە بۆ  كوردستان و ژمارەیەكی زۆر لە رێكخراوە ناحكومیەكان روویان لە هەرێمی كوردستان کرد و  بوونە هۆكارێك بۆ ئاوەدانكردنەوەی خەڵكی كوردستان و گەڕانەوەی دانیشتوانەكەی.

PUKmedia تەها عەبدوڵڵا/هەولێر