لێپرسراوی مه‌ڵبه‌ندی دهۆك: هیوامان به‌بادینانه‌

.

لێپرسراوی مه‌ڵبه‌ندی چواری دهۆك رایگه‌یاند، یه‌كێتیی نیشتیمانیی كوردستان بۆ هه‌ڵبژاردنی داهاتووی ئه‌نجومه‌نی نوێنه‌رانی عیراق چاوی له‌سه‌ر بادینانه‌و ده‌یه‌وێت له‌سنوری ئه‌و پارێزگایه‌ ده‌نگی باش به‌ده‌ستبهێنێت.

ئاراس محه‌مه‌د ئاغا، لێپرسراوی مه‌ڵبه‌ندی چواری یه‌كێتی له‌دهۆك تایبه‌ت به‌ PUKmedia ی ڕاگه‌یاند: "له‌دوای كۆنگره‌ی چواری حزبه‌كه‌مان، ئێمه‌ به‌ هێزه‌وه‌ له‌سنووری بادینان ده‌ستمان به‌كاری ڕێكخستنه‌كانمان كردووه‌، یه‌كێتی قوربانیه‌كی زۆری بۆ بادینان داوه‌و مه‌فره‌زه‌ سه‌ره‌تاییه‌كانمان له‌ شوڕشی نوێ له‌ بادینانه‌وه‌ ده‌ستیان پێكرد، ئه‌گه‌ر كاره‌ساتی هه‌كاری نه‌بوایه‌ بێ شك ئێمه‌ حزبی یه‌كه‌می بادینان بووین.

وتیشی: ڕۆژانه‌ خه‌ڵكی به‌ته‌مه‌ن و گه‌نج و خه‌ڵكی زویر بوو، بنه‌ماڵه‌و عه‌شیره‌ته‌كانی بادینان له‌سنووری 16 ی كۆمیته‌ی یه‌كێتی، هه‌ر له‌زاخۆ تا ناحیه‌ی كه‌ڵه‌كی یاسین ئاغا په‌یوه‌ندی به‌ڕیكخسته‌كانی یه‌كێتیی نیشتمانیی كوردستانه‌وه‌ ده‌كه‌ن و ئه‌مه‌ش وامانلێده‌كات هه‌وڵی خزمه‌تی زیاتریان بده‌ین.

به‌پێی یاسای هه‌ڵبژاردنی ئه‌نجومه‌نی نوێنه‌رانی عێراق، پارێزگای دهۆك (11) كورسی بۆ ته‌رخان كراوه‌و دابه‌شكراوه‌ بۆ (سێ) بازنه‌ی هه‌ڵبژاردن و پێویسته‌ له‌ هه‌ر بازنه‌یه‌ك یه‌ك ژن سه‌ربكه‌وێت واتا له‌پارێزگای دهۆك، هه‌شت پیاو و سێ ژن ده‌چنه‌ ئه‌نجومه‌نی نوێنه‌رانی عیراق.

بازنه‌كانی پارێزگای دهۆك به‌م شێوه‌یه‌ دابه‌شكراوه‌:
بازنه‌ی ناوه‌ندی دهۆك و ئامێدی، چوار كورسی بۆ ته‌رخانكراوه‌.
بازنه‌ی دووه‌می پارێزگای دهۆك، بازنه‌ی قه‌زای زاخۆ و سێمێله‌ كه‌ سێ كورسی بۆ ته‌رخانكراوه‌.
بازنه‌ی سێیه‌میش كه‌ چوار كورسی بۆ ته‌رخانكراوه‌ بریتییه‌ له‌ بازنه‌ی ئاكرێ و شێخان و به‌رده‌ڕه‌ش.

PUKmedia  كۆسره‌ت فه‌یسه‌ڵ كه‌تۆ