فراكسیۆنی یه‌كێتی: لێبرینی 3 موچه‌كه‌ی ئه‌مساڵ بدرێته‌وه‌ به‌فه‌رمانبه‌ران

.

سه‌ركۆ ئازاد گه‌ڵاڵی ،ئه‌ندامی لیژنه‌ی دارایی له‌ په‌ڕله‌مانی كوردستان له‌راگه‌یه‌نراوێكیدا ئاماژه‌ی به‌هه‌نگاوه‌كانی داڕشتنی بودجه‌ی هه‌رێم كردووه‌ و رایگه‌یاندووه‌ وه‌ك نوێنه‌رانی فراكسێونی یه‌كێتی له‌ لیژنه‌ی دارایی له‌ په‌رله‌مانی كوردستان  و  له‌ پێناو به‌رژه‌وه‌ندی گشتی ده‌ست ده‌كه‌ین به‌ فشاره‌ ره‌واكانمان بۆ سه‌ر حكومه‌تی هه‌رێمی كوردستان له‌پێناو جێكردنه‌وه‌ی ئه‌م خاڵانه‌ی خواره‌وه‌ له‌ بودجه‌ی هه‌رێم، كه‌ داواكاریی ره‌وای خه‌ڵكی كوردستانن ، ئه‌و په‌رله‌مانتاره‌ی یه‌كێتی داوای جێ به‌جێكردنی یاسای بودجه‌ی ده‌وڵه‌تی عیراق له‌ لایه‌ن هه‌رێمه‌وه‌ وه‌ك خۆی كردووه‌، بۆ ئه‌وه‌ی هیچ بیانوویه‌ك نه‌درێته‌ ده‌ست به‌غدا كه‌ پشكی هه‌رێم نه‌نێریت.

داواشیكردووه‌ یه‌كسانی له‌ خه‌رجكردنی پاره‌ی وه‌به‌رهێنان بۆ هه‌موو شار و شارۆچكه‌كانی هه‌رێمی كوردستان بچه‌سپێندرێت و لامه‌ركه‌زیی دارایی و نه‌هێشتنی جیاوازی و په‌راوێزخستنی ناوچه‌یه‌كی دیاری كراوه‌ له‌ بودجه‌ دا كارابكرێت.

ئه‌و په‌رله‌مانتاره‌ داواشیكردووه‌ بڕگه‌یه‌ك له‌ پڕۆژه‌ یاسای بودجه‌دا بۆ به‌ هه‌میشه‌یی كردنی فه‌رمانبه‌رانی گرێبه‌ست جێی بكرێته‌وه‌ و هاوكات حكومه‌ت پابه‌ندبكرێت به‌ پێدانی مووچه‌ له‌ كاتی خۆی و كۆتایی هێنانی بڕینی مووچه‌،  كه‌ پێویسته‌ ئه‌م بڕگه‌یه‌ له‌ مادده‌یه‌كی سه‌ربه‌خۆ له‌ بودجه‌ جێبه‌جێبكریت.

یه‌كێكی تر له‌ داواكارییه‌كانی سه‌ركۆ ئازاد گه‌ڵاڵی په‌رله‌مانتاری یه‌كێتی گه‌ڕاندنه‌وه‌ی لێبڕینی مووچه‌ بۆ مانگه‌كانی یه‌ك و دوو و سێ ساڵی 2021 مووچه‌خۆرانه‌. هه‌روه‌ها داوا ده‌كات حكومه‌تی هه‌رێم ئیلزام بكرێت به‌ جێ به‌جیكردنی مادده‌ی 13 له‌ یاسای چاكسازی، كه‌ تایبه‌ته‌ به‌ گه‌ڕاندنه‌وه‌ی پاشكه‌وتی مووچه‌ بۆ مووچه‌ خۆرانی هه‌رێمی كوردستان.

PUKmedia