گۆڕەكەی عەلی مەردان دەشێوێنرێت

.

لەشاری كەركوك گۆڕی هونەرمەندی گەورەی كورد عەلی مەردان لەلایەن دەستێكی نادیارەوە شێوێندراوەو شێواندنی گۆڕی ئەو هونەرمەندەش نیگەرانی لای هونەرمەندان و رۆشنبیرانی كەركوك لێكەوتەوە.

ئەمڕۆ 29ی 3ی 2021 لەبەرامبەر شێواندنی گۆڕی هونەرمەند عەلی مەردان هونەرمەندان و رۆشنبیرانی كەركوك گردبونەوەیەكی ناڕەزاییان لەسەر گۆڕەكەی هونەرمەند عەلی مەردان لەگۆڕستانی شێخ محێدینی شاری كەركوك رێكخست.

لەو گردبونەوەیەدا هونەرمەندان و رۆشنبیرانی كەركوك داوایان لەلایەنە پەیوەندارەكانی كەركوك كرد لێكۆڵینەوە لەشێواندنی گۆڕەكەی عەلی مەردان بكەن، عەبدولستار جەباری بەناوی رۆشنبیران و بەڕێوەبەرایەتی رۆشنبیری و هونەری كەركوك و هونەرمەندانی هەموو نەتەوەكانی كەركوك رایگەیاند: ئیدانەی شێواندنی گۆڕەكەی عەلی مەردان دەكەین و داواش  دەكەین لێكۆڵینەوە لەشێواندنی گۆڕەكە بكرێت و لایەنی ئەنجامدەر سزا بدرێن.

لەگردبونەوەكەدا هونەرمەند عومەر محەمەد وەك یەكێك لەخوێندكارانی  قوتابخانەكەی هونەرمەند عەلی مەردان نیگەرانی دەربڕی لەئاست فەرامۆشكردنی فەرهەنگ و كلتوری رۆشنبیری كەركوك و داوای لەهاوسەرۆكانی یەكێتی كرد گۆڕەكەی عەلی مەردان  لەگەڵ خانوە دێرینەكەی نوێ بكەنەوە كەچەند سەد مەترێك لەگۆڕەكەیەوە دوورەو ئەویش بكرێتە ناوەندێكی رۆشنبیری بۆ شارەكە.

PUKmedia پەیامنێرمان