لەكەركوك هێمای خۆشەویستی و پێكەوەژیان دادەدرێت

.

ئەمڕۆ بەتەنیشت قەڵای دێرینی كەركوك بۆردی پێكهاتەكانی یەكێتیی نیتشمانیی كوردستان، هێمایەكی بۆ خۆشەویستی و پێكەوە ژیان دانا.

لەو مەراسیمەدا كە نوێنەری پێكهاتەو نەتەوەكانی شارەكە ئامادەیی بوون، وتەیەك لەلایەن حەسیبە عەبدوڵڵا ئەندامی سەركردایەتی و لێپرسراوی بۆردی پێكهاتەكانەوە پێشكەشكراو وتی: پەردە لەسەر هێمایەك بۆ خۆشەویستی و پێكەوەژیان لادەبەین، تابلۆكەمان (خۆشم دەوێی كەركوك)ی لەسەر نەخشێنراوە كە هێمایەكە بۆ بەهێزكردنی بنەماكانی ئاشتی و برایەتی و پێكەوەژیانی راستەقینەی نێوان جەماوەری كەركوك بەهەموو پێكهاتەو نەتەوەو ئاین و ئاینزاكایەوە.

حەسیبە عەبدوڵڵا راشیگەیاند: ئێمە لەبۆردی پێكهاتەكانی یەكێتی كە نوێنەرایەتی پێكهاتە جیاجیاكان لەخۆ دەگرین كار دەكەین لەسەر پتەوتركردنی زیاتری گیانی برایەتی و پێكەوەژیان لەناوچە جێناكۆكاكان و بۆ ئەو هەنگاوەش سیاسەتی چەپكە گوڵەكەی سەرۆك مام جەلال-مان كردوەتە نەخشە رێگای كاركردنمان.

جەختیشیكردەوە بۆ داهاتوو چەندین پرۆژەمان دەبێت بۆ بەهێزتركردنی زیاتری گیانی برایەتی و پێكەوەژیان لەكەركوك و ناوچە جێناكۆكەكانی دیكە.

ئەوەشی خستەڕوو: دەمانەوێت رایبگەیەنین كەركوك دواجار بۆ خاوەندارە رەسەنەكانی دەمێنێتەوەوە.

لێپرسراوی بۆردی پێكهاتەكانی یەكێتی راشیگەیاند: دۆخی كاتی ئێستای كەركوك تێدەپەڕێت و دەرەنجام كەركوكییەكان خۆیان بەوپەڕی خۆشەویستیەوە درێژە بەگیانی برایەتی و پێكەوەژیانیان دەدەن لەكەركوك دوور لەهەر جۆرە جیاوازی.

نوێنەری پێكهتەكانی كەركوكیش ستایشی ئەو هەنگاوەیان كردو بەهەوڵێكی تری خەمخۆرانەی یەكێتی بۆ كەركوك ناوزەدیان كرد.

PUKmedia تایبەت