مرۆڤ لە مەنەفێستی ژیانیدا چەند رۆژێكی جیاوازی لە رۆژانیتر هەیە كە هەمیشە لە یاد ناچنەوە، بێگومان خۆشی و ناخۆشی تێدایە، بەردەوام و لە هەموو ئان و ساتەكان  لە زهنیەتم زەنگ لێدەدا  و لە رۆژدا و لە شەوانیشدا لەگەڵمدایە  ، بەڵام 5 رۆژ لە هەمویان كاریگەرترن، یەكەمیان كۆچی  دوایی باوكی خۆشەویستم بوو كە رێككەوتی رۆژی 13-11-1990، دووەمیان گرتنم بوو لە لایەن رژێمی بەعسەوە لە 22-6-1986، سێهەمیان كۆچی دوایی دایكی خۆشەویسم  بوو لە شەوی 12لەسەر 13 -12-2012، چوارەمیان دیسان گرتنم بوو لەشەڕی ناوەخۆ لە 12-10-1996، پێنجەمیان رۆژی ئازاد كردنی هەولێر  كە  خۆشترین رۆژ بوو كە دەكاتە رێككەوتی 11ی ئاداری 1991 ، ئای لەو بەیانیە خۆشە، من وێڕای ئەوەی لە چەند وردەكاریەك ئاگادار بووم  كە پێش وەختە پێمان وترا بوو ، ئەو شەوە من و رادیۆ و چەكەكەم دەست لە ملان بووین ، لەو بروسكەو هەواڵ و ئاگاداریكردنەوە لە منیش شیكرنەوە و بەدوا داچون ، هەرگیز  ئەو دەنگە زولالەی ئێزگەی دەنگی گەلی كوردستانم لە بیر ناچێتەوە كە نیوەی هەڵمەتەكە و جۆشدانی  ئەو  رادیۆ جەوهەردارە  بوو ، ئێستاش هەندێك جار لە خەودا دەیبینمەوە، هەرچەندە مرۆڤ لە زرمەی تۆپ و دەنگی تەقە دەترسێت،  بەڵام من ئەو بەیانیە زرمە و تەقەكانم وەك مۆسیقا دەهاتە بەر گوێ ، كە بانگی سەركەوتنیش درا،  ئیتر مەپرسە خۆشیەكە چەند گەورەبوو،  وەك موژدەی ژیانێكی نوێ بوو بۆ من و گەلە بەشمەینەتەكەم  ، گەلۆ راپەڕین لە بیر مەكەن دەست بە پرنسیبەكانیەوە بگرن، هێشتا زۆرمان  ماوە  ئامانجەكان بەدەست بێن و  بگەینە دوا مەنزڵ  ، هێشتا زۆرمان ماوە ئەوانەی لەسەر خەونی سەركەوتن سەرمەست بوون  بە ئاگایان بهێنینەوە پێان بڵێین بوەستن ، دوژمنان لە بۆسەدان ، ئەوە نیە  كەڵبەكانیان دەسون و بەردەوام هەڕەشە دەكەن  لەسەر یەك(( پولی پۆستە))  پەنجە هەڵدەشەقێنن و  داوای باج  و سەرانەی نەتەوەیی  و سیاسی دەكەن  ، كێ دەڵێت ئەوە ناكەنە وەرەقەیەك    بۆ گفتوگۆ  و هاوكێشە شەیتانیەكانیان  و رازاندنەوەی   مێزە  سیاسیەكانیان  بۆ سەوداكاری زیاتر بە سەروەریەكانی ئەم گەلە خێر لە خۆ نەدیوەمان  ، پێیان بڵێین وەئاگا وەرنەوە ئەم گەلە چەند جارێك گورگان خواردی كراوە ئەمجارەش گورگان خواردوومان مەكەن، پارە هیج نیە كورسیش هیج نیە، كورد و كوردستان  و ئامانج و بەرژەوەندیە باڵاكان هەموو شتێكە، درود بۆ  راپەڕین، درود بۆ شەهیدان و خانەوادە  سەربەرزەكانیان  ، درود بۆ ئەو كەسانەش   چاو لە ئاست ناحەزان و داگیركەران  دانانوقێنن و بە كردارەكی نەك بە دروشم و فرۆشتنەوە بەم و ئەو  لە خەمی كورد و كوردستان و دوا رۆژێكی مسۆگەردان. 

نووسینی.. عەبدولواحید محەمەد

PUKmedia تایبەت