دوای 51 ساڵ هێشتا كورد چاوه‌ڕێی به‌غدایه‌

.

ئه‌مڕۆ 51 ساڵ به‌سه‌ر راگه‌یاندنی به‌یاننامه‌ی 11ی ئازاردا تێده‌په‌ڕێت، كه‌ به‌ یه‌كێك له‌ ده‌ستكه‌وته‌ مێژووییه‌كانی گه‌لی كورد له‌ قه‌ڵه‌م ده‌درێت كه‌ هاوكات به‌ده‌ر نییه‌ له‌ چه‌ندین كه‌موكووڕیی و دواجار به‌ شكستی شۆڕشی ئه‌یلول، كۆتایی هات و رێكه‌وتننامه‌ی جه‌زائیری به‌شوێن خۆیدا هێنا.

حكومه‌ته‌ یه‌ك له‌دوایه‌كه‌كانی عیراق هه‌میشه‌ له‌حاڵه‌تی لاوازییدا ناچاربوون له‌گه‌ڵ كورد گفتوگۆو دانوستان بكه‌ن، به‌ڵام كاتێك به‌هێزبوونه‌ته‌وه‌ له‌بڕیاره‌كانیان پاشگه‌زبونه‌ته‌وه‌، نمونه‌ی زیندوش به‌یانامه‌ی 11ی ئازار و مفاوه‌زاره‌ته‌كه‌ی ساڵی (1984) ه‌، ئه‌گه‌رچی حكومه‌تی عیراقی له‌ساڵی 1970 دا چه‌ندان ده‌ستكه‌وتی وه‌ك به‌ڕێوه‌بردنی ناوچه‌ خۆجێیه‌كان له‌لایه‌ن به‌رپرسانی كورد خۆیان و داننان به‌ مافه‌ كه‌لتوریی نه‌ته‌وه‌ییه‌كانی كوردا نا، ئه‌مه‌ش ئه‌و واقعه‌ تاڵه‌بوو كه‌حكومه‌تی عیراقی له‌و قۆناغه‌دا ناچاركرد ئه‌م مافانه‌ به‌كورد بدات.

له‌ماوه‌ی  چوار ساڵی دوای به‌یاننامه‌ی 11 ی ئازار حكومه‌تی عیراق توانی خۆی به‌هێزبكاته‌وه‌ و نه‌وت خۆماڵی بكات و چه‌ندان رێككه‌وتنی كڕینی چه‌ك ئیمزا بكات، هه‌رله‌و ماوه‌یه‌دا به‌نهێنی كاری بۆ رێكه‌وتنامه‌ی جه‌زائیر كرد تا بتوانێت له‌و ڕێگه‌یه‌وه‌ شكست به‌شۆڕشی كورد بهێنێت.

ئه‌مڕۆش 51 ساڵ به‌سه‌ر راگه‌یاندنی به‌یاننامه‌ی 11ی ئازار تێده‌په‌ڕێت، به‌ڵام هێشتا كورد چاوی له‌ ده‌ستی حكومه‌تی عیراقه‌ تا مافه‌كانی پێ بدات.

PUKmedia  تایبه‌ت