ئه‌مڕۆ دوو شه‌ممه‌ 8-3-2021 به‌ئاماده‌بوونی هه‌ڤاڵان د.میران محمد ئه‌ندامی مه‌كته‌بی سیاسی و لێپرسراوت مه‌كته‌بی رێكخراوه‌ دیموكراتییه‌كان و فه‌همی بورهان ئه‌ندامی سه‌ركردایه‌تی و لێپرسراوی بۆردی رێكخراوه‌ پیشه‌ییه‌كان و ژینۆ محه‌مه‌د ئه‌ندامی سه‌ركردایه‌تی و لێپرسراوی بۆردی رێكخراوه‌ جه‌ماوه‌رییه‌كان و (NGO)كان و ژماره‌یه‌ك له‌ ئه‌ندامان و كادرانی مه‌كته‌ب، خه‌ڵاتی رێزلێنان به‌سه‌ر ژنان و كچانی رێكخراوه‌كان و باره‌گای مه‌كته‌بدا دابه‌شكرا.

له‌مه‌راسیمه‌كه‌دا كه‌ به‌چه‌ند ساتێك وه‌ستان بۆ گیانی پاكی شه‌هیدان ده‌ستیپێكرد، لێپرسراوی مه‌كته‌ب وته‌یه‌كی پێشكه‌شكردو رایگه‌یاند، ئێمه‌ وه‌كو یه‌كێتی نیشتیمانی كوردستان، له‌سه‌ره‌تای دروستبوون و دواتریش ده‌ستپێكردنی خه‌باتی چه‌كداری و رێكخراوه‌ییدا، رۆڵی به‌رچاوو گه‌وه‌ره‌مان داوه‌ به‌ژنان، ژنانیش به‌تواناو لێهاتویی خۆیان توانیویانه‌ پێگه‌ی گرنگ و گه‌وره‌ له‌ناو یه‌كێتیدا بۆ خۆیان ببه‌ن و جێ په‌نجه‌یان دیاری بكه‌ن، هه‌تاوه‌كو ده‌گات به‌راپه‌ڕین و حكومڕانی خۆبه‌خۆی كوردستان و به‌ڕێوه‌بردنی دام و ده‌زگا حكومی و حزبییه‌كان.

دواتر ژینۆ محه‌مه‌د ئه‌ندامی سه‌ركردایه‌تی و لێپرسراوی بۆردی رێكخراوه‌ جه‌ماوه‌رییه‌كان و (NGO)كان، له‌وته‌یه‌كیدا باسی له‌و هه‌نگاوانه‌كرد كه‌ پێویسته‌ بنرێت بۆ زیاتر خزمه‌تكردنی ژنان و كچانی كوردستان و ئاماژه‌ی بۆ ئه‌وه‌كرد، پێویسته‌ رێكخراوه‌كان رۆڵیان هه‌بێت له‌هۆشیاركردنه‌وه‌ی زیاتری ژنان و كچان و پێشنیاریان هه‌بێت بۆ حكومه‌ت و حزب، هه‌روه‌ها ده‌بێت رۆڵی سه‌ره‌كی بگێڕن بۆ هه‌مواركردنه‌وه‌و داڕشتنه‌وه‌ی ئه‌و یاسایانه‌ی كه‌ هه‌ن بۆ خزمه‌تی ژنان، ووتیشی، ده‌بێت بۆ له‌مه‌ودوا هه‌وڵه‌كانتان به‌و ئاڕاسته‌یه‌بن كه‌ چیتر كۆتا له‌هیچ شوێنێك بۆ ژنان قبوڵنه‌كه‌ن و به‌پێی ئه‌و ماندوبوونه‌ی هه‌تانه‌ پۆست و پایه‌ی خۆتان وه‌ربگرن.

له‌كۆتایشدا فه‌همی بورهان ئه‌ندامی سه‌ركردایه‌تی و لێپرسراوی بۆردی رێكخراوه‌ پیشه‌ییه‌كان، كه‌ چالاكییه‌كه‌ له‌لایه‌ن بۆرده‌كه‌ی به‌ڕێزیانه‌وه‌ ئاماده‌كرابوو، خۆشحاڵی خۆی به‌مجۆره‌ چالاكییانه‌ پیشانداو ئاماژه‌ی بۆ ئه‌وه‌كرد، زیاتر گوێ له‌خواستی ژنان و كچانده‌گرین، ئێوه‌ش به‌نوێنه‌رایه‌تی مه‌كته‌ب و یه‌كێتی نیشتیمانی كوردستان، زیاتر تێكه‌ڵ به‌ژنان و كچانی كۆمه‌ڵگه‌ببن و گرفت و داواكانیان بگه‌یه‌نن و ئێمه‌ش بۆ هه‌ر هه‌نگاوێك هاوكارو پشتیوان ده‌بین.

له‌كۆتایشدا خه‌ڵات به‌سه‌ر ژنان و كچانی رێكخراوه‌كان و باره‌گای مه‌كته‌بدا دابه‌شكراو كۆتایی به‌ رێوره‌سمه‌كه‌ هێنرا.

PUKmedia