یەكێتی: وەك هەمیشە پشتیوانی خەباتی ژنان دەبین

.

بەبۆنەی 8ی مارس، رۆژی جۆشدانەوەی خەباتی ژنان، مەكتەبی سیاسی یەكێتیی نیشتمانیی كوردستان پەیامێكی بڵاوكردەوە و رایگەیاند، یەكێتی وەك هەمیشە پشتیوانی خەباتی ژنانە و بۆ ئێستا ‌و داهاتوویش درێغی ناكات.

دەقی پەیامەكە:

پەیامی مەكتەبی سیاسی یەكێتیی نیشتمانیی كوردستان بۆ (8)ی مارس رۆژی جیهانی ژنان

 (8)ی مارس، بۆنەی جۆشدانەوەی خەباتی ژنانی ئازادیخوازو یەكسانیخوازی كوردستان و جیهانە، لەم رۆژەدا، پیرۆزبایی لە هەموو ژنان ‌و كچانی ئازادیخوازی كوردستان دەكەین. 

    (8)ی مارس، ڕۆژی جۆشدانەوەی خەباتی ژنانە، بۆ بەدیهێنانی مافەكانیان و چەسپاندنی یەكسانی جێندەری و رزگاربوون لەو نەریت ‌و بیركردنەوە كۆن ‌و داسەپاوانەی، كە بوونەتە هۆی چەوساندنەوەی ژنان و بێبەشبوونیان لە مافە كۆمەڵایەتی ‌ویاساییەكانیان ‌و بەشداری كارای ژنانیان لە بوارە  گرنگەكانی ژیان و كۆمەڵدا كۆت‌و بەند كردووە.  

   ژنانی كوردستان، بەشداری كاریگەریان لە خەباتی نیشتمانیی و نەتەوەیی كردووە بۆ ڕزگاربوون لەزوڵم و ستەمی  داگیركاران و رووبەربونەوەی مەترسیەكانی تیرۆر، بۆیە لەم ڕۆژەدا یادی (8) مارس تەنها وەك بۆنەی خەباتی یەكسانیخوازی ژنان ناكەینەوە، بەڵكو یادی ژنە شەهید و تێكۆشەرەكانیش دەكەینەوە، كە بوونەتە هێمای ئازایەتی ژنانی كوردستان و لەسەنگەری بەگژاچوونەوەی دوژمنانی ئازادی و مرۆڤایەتی و گەلەكەماندا و لە جینۆسایدی ئەنفال و كیماباران و جینۆسایدی ئێزیدیەكان و لە زیندانەكاندا سەربەرزانە گیانیان بەخشی.  یادی ئەو ژنانەش دەكەنەوە بەهۆی توندوتیژییەوە بوونە قوربانی. هەروەها یادی ئەو ژنانەی لەكوردەواریدا ماییەی شانازین، یادی خۆڕاگری دایك و هاوسەر و كچی شەهیدان و ئەنفالكراوەكانیش دەكەینەوە و سەری رێز لە ئاستی سەری بەرزیاندا دادەنەوێنین. 

     لەدوای راپەرین لە خەباتی مەدەنی و دیموكراسیشدا بۆ بەگژاچوونەوەی جیاكاری ڕەگەزی و توندوتیژی بەرامبەربە ژنان و گۆڕینی یاسا كۆنەكان  بەیاسای هاوچەرخ، كە مافی ژنان دەستەبەر بكات، هەنگاوی گەورەیان ناوە. بەڵام هێشتا رێگای تێكۆشانی ژنانی كوردستان، بۆرزگاربوون  لە توندوتیژی و جیاوازی جێندەری و بەجێهێنانی ئەركە نیشتمانی ‌و دیموكراسیەكان دوور و درێژە.  

   یەكێتیی نیشتمانیی كوردستان، وەك هەمیشە پشتیوانی  خەباتی ژنانەو بەكردەوەش چەندین دەستكەوتی بۆ ژنان بەدیهێناوە، بۆ ئێستا ‌و داهاتوویش درێغی ناكات لە پشتیوانی كردنی خەباتی ژنان و رەخساندنی زەمیەی لەبارتر بۆ بەشداری كردنی كارای ژنان لە هەموو بوارەكاندا ‌و چارەسەركردنی كێشە كۆمەڵایەتی ‌و یاساییەكانیان ‌و هێنانەپێشەوەی خوێنی نوێ‌ ‌و ووزەی نوێی كچانی ئازادیخواز. 

پیرۆزبێت (8)ی مارس، رۆژی جیهانی ژنان

سەركەوێت خەباتی یەكسانیخوازانەی ژنانی كوردستان 

مەكتەبی سیاسی

یەكێتیی نیشتمانیی كوردستان

(8)ی مارسی 2021

PUKmedia تایبەت