هاوسەرۆكی یەكێتی: بینینی كەسوكاری شەهیدان و چیرۆكی رۆڵەكانیان تەزو بەلەشدا دەهێنێت

.

ئەمڕۆ 7ی 3ی 2021 لەساڵیادی راپەڕینە مەزنەكەی شاری سلێمانی و لە مۆزەخانەی نیشتمانی (ئەمنەسورەكە)، لاهور شێخ جەنگی هاوسەرۆكی یەكێتیی نیشتیمانیی كوردستان پێشانگای ئەلبومی دایكی سەروەرانی كردەوە.

لەو مەراسیمەدا كە ژمارەیەك لە ئەندامانی مەكتەبی سیاسی و سەركردایەتی یەكێتیی ئامادەیبوون، لاهور شێخ جەنگی لە نزیكەوە لە زاری كەسوكاری شەهیدان و دایكە سەروەرو مەزنەكانیانەوە گوێی لە چیرۆكی ناخ هەژێنی شەهید بوونی هەزاران رۆڵەی ئەم نیشتیمانە گرت كە لە پێناو ئازادی و  سەربەستی كوردستان رووبارێك خوێنیان بەخشی و ئەمرۆیان بۆ بەرهەم هێناوە.

لە میانی گفتوگۆ لەگەڵ كەسوكاری شەهیدان، لاهور شێخ جەنگی رایگەیاند: ئەو دایكە جەرگ سوتاوانەی كە هەریەكەیان زیاد لە سێ رۆڵەی خۆیان پێشكەش بە كوردستان كردوەو لە ئەلبومی دایكی سەروەراندا تۆماركراون، شانازییەكی گەورەیان بۆ  بەزیندویی هێشتنەوەی شەهیدەكانیان و یەكێتییەكەیان تۆماركردوە كە مێژوو هەمیشە بەگەورەیی باسیان دەكات و ئێمە و مانانیش  بەردەوام شانازییان پێوە دەكەین و لە ئاست نەمری و فیداكارییان سەریان بۆ دادەنەوێنین.

راشیگەیاند: وەفاداریی بۆ دایكی سەروەران و ئاسودەكردنی رۆحی شەهیدەكانمان، درێژە پێدانە بەڕێبازە پیرۆزەكەیان و پارێزگاریكردنە لە ئازادی و بەها باڵاكان و دەستكەوتەكانی راپەرین و خزمەتكردنی كۆمەڵانی خەڵكی كوردستان و گەشەپێدان و بەهێزكردنی یەكێتییی.

هاوكات لاهور شێخ جەنگی لە دەفتەری یادگارییەكاندا یاداشتێكی تۆماركردو ئاماژەی بۆ ئەوەكرد كە بینینی كەس و كاری شەهیدان و گێرانەوەی چیرۆكی شەهیدبوونی رۆڵەكانیان تەزوی بە لەشدا هێناو هانیداین كە زیاتر تێبكۆشین بۆ بەدیهێنانی ئاواتی شەهیدەكانمان.

هاوسەرۆكی یەكێتیی نیشتیمانیی كوردستان سوپاسی بۆردی ئەرشیف و مێژوویكرد لە مەكتەبی گەشەپێدانی بیرو هۆشیاریی  و سوپاسی خاتوو ئەمیرە محەمەدی كرد بۆ كۆكردنەوەو ئامادەكردنی  ئەلبومی دایكی سەروەران.

PUKmedia