پەرلەمان یاسای قەرەبووكردنەوەی ژنان و كچانی ئێزدی پەسەند دەكات

.

پەرلەمانی عیراق لەكۆبوونەوەی ئەمڕۆیدا یاسای ژنان و كچانی رزگاربووی ئێزدی ژێر دەستی داعشی پەسەندكردو بەپێی یاساكەش دەبێت ئەو رزگاربووە ئێزدییانە قەرەبوو بكرێنەوە.  

لەبارەی پەسەندكردنی یاساكەوە، بەختیار شاوەیس وتەبێژی فراكسیۆنی یەكێتی لەپەرلەمانی عیراق بە PUKmediaی راگەیاند: بەپێی یاسا پەسەندكراوەكە قەرەبووی سەرجەم ئەو ژن و كچە ئێزدییانە دەكرێتەوە كە لەژێر دەستی داعش رزگاریان بووە، ئەویش بەبڕینەوەی مووچەیەك و پێدانی پارچەیەك زەوی یان یەكەیەكی نیشتەجێبوون.

وتیشی: خاڵێكی تری گرنگی پرۆژەكەش دەبێت ئەو ناوچانەی تاوانەكەی تێدا كراوە كە شەنگال و دەوربەریەتی ئاوەدان بكرێتەوە.

لای خۆشیەوە رێزان شێخ دلێر پەرلەمانتاری فراكسیۆنی یەكێتی بە PUKmediaی راگەیاند: پەسەندكردنی یاساكە دەستكەوتێكی گرنگە، چونكە دەبێت سەرجەم ئەو ژن و كچانەی لەژێر دەستی داعش رزگاریان بووە قەرەبوو بكرێنەوە ئەویش بەبڕینەوەی موچەو پێدانی زەویی یان یەكەی نیشتەجێبوون، هەروەها كەسوكاری شەهیدەكانیش لەیاساكە سودمەندن دەبن.

PUKmedia تایبەت