دادگای هه‌ولێر بڕیاریداوه‌ دوای ته‌واوكردنی سزاكه‌یان، پێنج چالاكوان و رۆژنامه‌نوسه‌كه‌ی بادینان، بۆ ماوه‌ی 5 ساڵ له‌ژێر چاودێرییدا بن.

به‌پێی ده‌قی نوسراوی سه‌رۆكایه‌تی دادگای تێهه‌ڵچوونه‌وه‌ی ناوچه‌ی هه‌ولێر، دادگای تاوانی هه‌ولێر / 2 ، كه‌ له‌16-2-2021 سه‌باره‌ت به‌ سزادانی رۆژنامه‌نوس و چالاكوانانی بادینان ده‌رچووه‌و ئیمزای دادوه‌ر ( زرار مه‌حمود موراد خان) وه‌ك سه‌رۆك و دادوه‌ران (سه‌ركه‌وت ته‌ها ره‌سوڵ و ئه‌ریڤان مسته‌فا محه‌مه‌د) ی به‌سه‌ره‌وه‌یه‌ دادگا بڕیاری شه‌ش ساڵ زیندانی به‌سه‌ر هه‌ر پێنج رۆژنامه‌نوس و چالاكوانه‌كه‌دا داوه‌و به‌پێی حوكمه‌كانی مادده‌ی 1 له‌یاسای ژماره‌ 21 ساڵی 2003 .

هه‌روه‌ها دادگا بڕیاریشی داوه‌ كه‌ هه‌ر پێنج رۆژنامه‌نوس و چالاكوانه‌كه‌ دوای ته‌واوكردنی ماوه‌ی حوكمه‌كه‌یان بۆ ماوه‌ی 5 ساڵ له‌ژێرچاودێری پۆلیسدا بمێنه‌وه‌، هه‌روه‌ك دادگا بڕیاریشیداوه‌ مۆبایل و كۆمپیته‌رو كامێرای رۆژنامه‌نوس و چالاكوانه‌كان ده‌ست به‌سه‌ردا بگرێت و ره‌وانه‌وه‌ی وه‌زاره‌تی داراییان بكات بۆ ئه‌وه‌ی هه‌ڵسه‌وكه‌وتیان پێوه‌بكات.

بڕیاری دادگا مافی ئه‌وه‌شی به‌ ئه‌نجومه‌نی ئاسایش داوه‌ كه‌ داوای مافی مه‌ده‌نی خۆی له‌به‌رده‌م دادگا مه‌ده‌نییه‌كانی هه‌رێم بكات، دوای ئه‌وه‌ی حوكمی دادگا پله‌ی كۆتایی وه‌رده‌گرێت.

هه‌ر وه‌ك دۆسیه‌كه‌شی ره‌وانه‌ی دادگای ته‌ممیزی هه‌رێمی كوردستان كردوه‌ بۆ گرتنه‌به‌ری رێوشوێنی ووردبینی كردن.
ناوی چالاكوانان و رۆژنامه‌نوسانی بادینان كه‌له‌ نوسراوه‌كه‌ی دادگای هه‌ولێردا هاتووه‌.

1-    شیروان ئه‌مین
2-    شڤان سه‌عید
3-    هاریوان عیسا
4-    ئه‌یاز كه‌ره‌م
5-    گوهدار محه‌مه‌د

PUKmedia تایبه‌ت