داوای هەڵدانەوەی بەپەلەی گۆڕە بەكۆمەڵەكان لە شەنگال دەكرێت

.

لیژنەی كاروباری كۆمەڵایەتی نوێنەرایەتی داوایكرد پەلە بكرێت لەهەڵدانەوەی گۆڕە بەكۆمەڵەكان لەقەزای شەنگال و جەختیش دەكاتەوە كە پێویستە حكومەتی فیدڕاڵی گرنگی زیاتر بەم دۆسیەیە بدات.

حسێن نەرمۆ، ئەندامی لیژنەكە، ئەمڕۆ دووشەممە ٢٢ی شوبات، لەلێدوانێكی تایبەتدا بۆ PUKmedia رایگەیاند: 81 گۆڕی بەكۆمەڵ لەسنووری ئیدارەی قەزای شەنگالدا هەیە، بەڵام تاوەكو ئێستا تەنها 20 گۆڕیان هەڵدراونەتەوە، جەختیشی كردەوە كە ژمارەیەك گۆڕی بەكۆمەڵ هەیە كە تاوەكو ئێستا هەڵنەدراونەتەوە، بۆ نموونە، لەگوندی حەردانی سەر بەناحیەی سنونێ‌ 6 گۆڕی بەكۆمەڵ هەیەو شوورای بەدەوردا گیراوەو تا ئێستا هەڵنەدرانەوتەوە، بۆیە پێویستە حكومەت و بەتایبەت ئەمیندارێتی گشتی ئەنجومەنی وەزیران گرنگی جددی بەم پرسە بدات و فەرمانگە پەیوەندیدارەكان بەتایبەتی ئەوانەی پەیوەستن بە گۆڕە بەكۆمەڵەكان پەلە بكەن لەهەڵدانەوەی ئەم گۆڕانە.

پەرلەمانتار حسێن نەرمۆ راشیگەیاند: جارێكی تر جەختدەكەینەوە كە پێویستە حكومەت پەلەبكات لەهەڵدانەوەی ئەم گۆڕە بەكۆمەڵانە، و ناساندنیان بەخانەوادەكانیان و ناشتنیان بەگوێرەی دابونەریتی كوردانی ئێزیدی.

PUKmedia فائق ئێزیدی