riklam

له‌ساڵیادی ئه‌نفالی دۆڵی جافایه‌تیدا

جینۆساید‌‌ 10:35 PM - 2021-02-21
.

.

ڕژێمی به‌عس یه‌كێك بو له‌سه‌رسه‌خترین ڕژێمه‌ تۆتالیتار وفاشییه‌كانی ڕۆژھه‌ڵاتی ناوه‌ڕاست ، ئه‌و ته‌نھا باوه‌ڕی به‌ڕژێمی تاكه‌ حیزبی وتاكه‌ نه‌ته‌وه‌ی سه‌رده‌ست ھه‌بو له‌فه‌رمانڕه‌وایه‌تی وبه‌ڕێوه‌بردنی عێراقدا ، له‌به‌رانبه‌ر نه‌ته‌وه‌ وده‌نگه‌ ناڕازییه‌كانی تری نێو ئه‌و وڵاته‌دا ،ھه‌میشه‌ سیاسه‌تی ئاگر وئاسن وكوشتن وبڕینی په‌یڕه‌و ده‌كرد .
بۆیه‌ ھه‌میشه‌ له‌پیلان وبه‌رنامه‌ی دوژمنكارانه‌ ده‌گه‌ڕا بۆ كپكردن وله‌ناوبردنی گه‌لی كورد ، ھه‌رگیز ئاماده‌ نه‌بو مل بۆ داخوازییه‌كانی ئه‌م نه‌ته‌وه‌یه‌ بدات ، بگره‌ چه‌ندین سیاسه‌تی كوشنده‌ی له‌دژی گه‌لی ئێمه‌ پراكتیزه‌ ده‌كرد ، به‌ڵگه‌ش سیاسه‌ته‌ نه‌گریسه‌كانی ڕاگواستن وبه‌عه‌ره‌بكردن ووێران كردنی خاكی كوردستان بو .
كاتێكیش شۆڕشی نوێ گه‌له‌كه‌مان به‌ڕابه‌رایه‌تی (ی.ن.ك)ھه‌ڵایسا، گورزی كوشنده‌ وجه‌رگ بڕ  ئاراسته‌ی بون وپێگه‌ی ئه‌و ڕژێمه‌ كرا ، به‌خه‌باتی نه‌پساوه‌ وگیانفیداكاری پێشمه‌رگه‌ وقوربانی زۆری تێكۆشه‌ران وخه‌ڵكی قاره‌مانی كوردستان ، شۆڕشی نوێ وداخوازی وبونی كورد له‌م پارچه‌یه‌ی نیشتێمانی دایك چووه‌ قۆناغێكی گرنگ وبه‌رھه‌م داره‌وه‌ .
ئه‌م دۆخه‌ش دووھێنده‌  ڕژێمی به‌عس وسه‌رۆكه‌كه‌ی دوچاری ھه‌ستریا وناڕه‌حه‌تی كردبو ، به‌تایبه‌تی له‌كاتی شه‌ڕی عێراق-ئێران دا ، ھه‌ر بۆیه‌ ئه‌و ڕژێمه‌ سه‌ره‌ڕۆ ودیكتاتۆره‌ له‌ده‌رفه‌ت وھه‌لده‌گه‌ڕا بۆ قڕكردنی كورد وله‌ناوبردنی شۆڕشه‌كه‌ی ، كاتێكیش جه‌نگی خوێناوی ھه‌شت ساڵه‌ی نێوان ھه‌ردوولا وه‌ستێنرا ، له‌یه‌كه‌م ھه‌نگاوی دوژمنكارانه‌ی به‌عسدا ، پیلانی ئه‌نفالكردنی كوردی داڕشت ، دوای پیلان دانان وكۆكردنه‌وه‌ی ھێزی زۆربۆر ، پرۆسه‌ی به‌دناوی ئه‌نفال بۆ سه‌ر ناوچه‌ئازادكراوه‌كانی ژێر ده‌سه‌ڵاتی ھێزی پێشمه‌رگه‌ ده‌ست پێكرد.
سه‌ره‌تای ئه‌م پرۆسه‌ نه‌گریسه‌ش بۆ سه‌ر دۆڵی جافایه‌تی وناوچه‌ ودیھاته‌كانی ده‌وروبه‌ری بو ، ئه‌وێی ڕۆژێك به‌ھه‌زاران سوپاس وجاشه‌وه‌ ، به‌چه‌كی قورسی زۆروزه‌وه‌نده‌وه‌ په‌لاماری ھێزه‌كانی پێشمه‌رگه‌ ودیھاته‌كانی ئه‌و سنوره‌ی دا ، سه‌ره‌ڕای به‌رگری كه‌م وێنه‌ وتۆماركردنی داستان وسه‌روه‌ری گه‌وره‌ ، سه‌رئه‌نجام به‌ھۆكاری جیاجیا وبه‌تایبه‌تی نابه‌رابه‌ری ھێز وچه‌ك ، ڕژێم توانی یه‌كه‌م قۆناغی ئه‌نفال له‌و سنوره‌ ئه‌نجام بدات ، سه‌ره‌ڕای ئه‌وه‌ی ژماره‌یه‌ك پێشمه‌رگه‌ی قاره‌مان شه‌ھیدبون ، ھاوكات له‌ژێر ناوی ئه‌نفالدا پرۆسه‌ی تاڵانكردن وقڕكردنی دانیشتوانی گونده‌كانی ده‌ستی پێكرد وزیان گیانی ومادییه‌كان گه‌لێك زۆربون وكاریگه‌ری نه‌رێنییان به‌جێھێڵا.
ئه‌م شاڵاوه‌ش بۆ سه‌ر دۆڵی جافایه‌تی وئه‌و سنوره‌ بووه‌ سه‌ره‌تایه‌ك ، كه‌ڕژێم به‌دوای یه‌كدا قۆناغه‌كانی تری ئه‌نفال بخاته‌ بواری جێ به‌جێكردنه‌وه‌ ، كه‌تێدا زیانی مرۆیی وئابوری وكۆمه‌ڵایه‌تی به‌ر گه‌لی كورد كه‌وتن ، سه‌رباری ئه‌وه‌ی زیانی زۆریش به‌ر ھێزه‌كانی پێشمه‌رگه‌ وشۆڕشی نوێ كه‌وتن.
لانی كه‌م له‌م قۆناغه‌ی ئه‌نفالدا ، كه‌به‌قۆناغی یه‌كی ئه‌نفال ناسراوه‌ ، زیانه‌كان بریتیبون له‌:
- به‌كۆی گشتی ٤٨٢ ئه‌نفالیان هه‌یه‌.
- ٣٥٨ ڕووفاتیان له‌و مۆنۆمێنته‌دان ، كه‌له‌قه‌زای دوكان دروستكراوه‌ .
- ٩ كه‌س له‌و شه‌ھیدانه‌ی ئه‌نفالی دۆڵی جافایه‌تی خه‌ڵكی گه‌رمیانن .
له‌ساڵیادی ئه‌نفالی دۆڵی جافایه‌تی وده‌وروبه‌ریدا ، سڵاو ودرود بۆ گیانی شه‌ھیدانی ئه‌نفالی ئه‌و سنوره‌ وته‌واوی شه‌ھیدانی كوردستان ، سه‌ربه‌رزی بۆ خانه‌واده‌ خۆڕاگر وتێكۆشه‌ره‌كانیان .


نوسینی/ حه‌سه‌ن بارام


PUKmedia تایبه‌ت

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket