ئه‌مڕۆ 21-2-2021، له‌هۆڵی خاك له‌شاری سلێمانی، خاتوو شاناز ئیبراهیم ئه‌حمه‌د كارگێڕی مه‌كته‌بی سیاسی(ی.ن.ك) له‌گه‌ڵ به‌رێوه‌به‌ری گشتی ته‌ندروستی سلێمانی و ژماره‌یه‌ك له‌به‌ڕێوه‌به‌ری نه‌خۆشخانه‌ و ناوه‌ند و بنكه‌ی ته‌ندروستی و پزیشك و كارمه‌ندانی ته‌ندروستی سنوری پارێزگاری سلێمانی دا كۆبۆوه‌.

له‌كۆبوونه‌وه‌كه‌دا، كه‌ به‌رێوه‌به‌ری گشتی ته‌ندروستی هه‌ڵه‌بجه‌ ئاماده‌یی بوو، دۆخی ئێستای كه‌رتی ته‌ندروستی و هه‌وڵه‌كان  بۆ رووبه‌رووبونه‌وه‌ی په‌تای كۆرۆنا و هه‌ڕه‌شه‌كانی جۆره‌ گۆڕاوه‌كه‌ی كۆرۆنا تاوتوێكراو دكتۆر سه‌باح هه‌ورامی به‌رێوه‌به‌ری گشتی ته‌ندروستی سلێمانی ئاماژه‌ی به‌ رۆڵی بێ وێنه‌ و كاریگه‌ر وپشتیوانییه‌ به‌رده‌وامه‌كانی سه‌رۆك مام جه‌لال و خاتوو هێرۆ ئیبراهیم ئه‌حمه‌د كرد بۆ سه‌رخستنی كاروباره‌كانی كه‌رتی ته‌ندروستی، هاوكات داواشیكرد یه‌كێتیی نیشتمانیی كوردستان به‌چاوێكی جیاواز و تایبه‌ته‌وه‌ پشتیوانی له‌م كه‌رته‌ گرنگه‌ بكات، دواتر راپۆرتێكی ده‌رباره‌ی دۆخی ئێستای ئه‌و كه‌رته‌ گرنگه‌ی په‌یوه‌ست به‌ژیانی هاوڵاتیانه‌وه‌ پێشكه‌شكرد و ئاماژه‌ی به‌گرفت و ئاسته‌نگه‌كانی به‌رده‌م جێبه‌جێكردنی هه‌وڵه‌كانیان كرده‌وه‌.

لای خۆشییه‌وه‌، خاتوو شاناز ئیبراهیم ئه‌حمه‌د به‌گرنگییه‌وه‌ له‌ڕۆڵی پزیشك و كارمه‌ندانی ته‌ندروستی و سه‌رجه‌م لایه‌نه‌ په‌یوه‌ندیداره‌كانی رووانی و رایگه‌یاند: ئێوه‌ ئه‌ركێكی گرنگتان له‌ئه‌ستۆیه‌ وه‌ك یه‌كێتیی نیشتمانیی كوردستان دڵسۆزی و شه‌ونخونی پزیشك و كارمه‌ندانی ته‌ندروستی له‌بیرناكه‌ین بۆ جێبه‌جێكردنی ئه‌م ئه‌ركه‌ گرنگه‌ مرۆییه‌ سه‌رباری نه‌بوون و لێبڕین و دواكه‌وتنی دابه‌شكردنی مووچه‌ به‌تایبه‌ت له‌كاتی كه‌ره‌نتین و بڵاوبوونه‌وه‌ی ڤایرۆسی كۆرۆنادا ئێوه‌ به‌رده‌وام بوون له‌كاركردن و له‌ریزی پێشه‌وه‌ی رووبه‌رووبونه‌وه‌یدا بوون، بۆیه‌ زۆر زۆر سوپاستان ده‌كه‌م و ده‌ستی ماندووبونتان ده‌گوشم.

كارگێڕی مه‌كته‌بی سیاسی یه‌كێتی، وتیشی: پێویسته‌ حكومه‌تی هه‌رێمی كوردستان گرنگییه‌كی تایبه‌ت بداته‌ كه‌رتی ته‌ندروستی و به‌جێگه‌یاندنی داواكاریی و پێداویستییه‌كانی نه‌خۆشخانه‌كان و ئاماده‌سازی پێویست بكات بۆ رووبه‌رووبونه‌وه‌ی هه‌ر  كێشه‌ و گرفتێكی ته‌ندروستی.

خاتوو شاناز ئیبراهیم ئه‌حمه‌د، باسی له‌وه‌شكرد، وه‌ك یه‌كێتیی نیشتمانیی كوردستان به‌رده‌وام ده‌بین له‌پشتیوانیكردنی كه‌رتی ته‌ندروستی و به‌پلان و پرۆژه‌ی نوێوه‌ هه‌وڵی به‌به‌دیهێنانی ماف و ئیمتیازاته‌كانی پزیشك و كارمه‌ندانی ته‌ندروستی ده‌ده‌ین له‌ هه‌رێمی كوردستان، وتیشی دوای له‌نزیكه‌وه‌ ئاگاداربوون له‌گرفت و داواكارییه‌كانتان، به‌ڵێنتان پێ ده‌ده‌م هه‌میشه‌ پشتیوانتان بم و هه‌وڵی چاره‌سه‌ركردنی كێشه‌كانتان بده‌م.

PUKmedia تایبه‌ت