كۆچ و كۆچبه‌ران: وه‌زیری ناوخۆی هه‌رێم رێگره‌ له‌گه‌ڕانه‌وه‌ی ئاواره‌كان

.

وه‌زاره‌تی كۆچ و كۆچبه‌رانی عیراق رایده‌گه‌یه‌نێت: وه‌زیری ناوخۆی هه‌رێم رێگره‌ له‌داخستنی كه‌مپه‌كان و گه‌ڕاندنه‌وه‌ی ئاواره‌كان بۆ زێدی خۆیان و هێشتنه‌وه‌ی ئاواره‌كانیش له‌و ناوچانه‌ به‌كارهێنانیانه‌ بۆ مه‌رامی سیاسی له‌كاتی هه‌ڵبژاردنه‌كاندا.

كه‌ریم نوری بریكاری وه‌زاره‌تی كۆچ و كۆچبه‌رانی عیراق له‌ راگه‌یه‌نراوێكدا كه‌ وێنه‌یه‌كی گه‌یشتوه‌ته‌  PUKmedia، ئاماژه‌ی به‌وه‌داوه‌ وه‌زاره‌تی كۆچ و كۆچبه‌ران پلانی هه‌یه‌ بۆ دانانی سنورێك له‌به‌رده‌م به‌كارهێنانی ئاواره‌كان له‌ كه‌مپه‌كاندا بۆ مه‌رامی سیاسی، چونكه‌ له‌كاتی هه‌ڵبژاردنه‌كاندا دۆسییه‌ی ئاواره‌كان بۆ ئامانجی سیاسی به‌كارده‌هێنرێن.

 روونیشیكرده‌وه‌: وه‌زاره‌تی كۆچ و كۆچبه‌ران هه‌موو هه‌وڵه‌كانی ده‌خاته‌گه‌ڕ بۆ گه‌ڕانه‌وه‌ی ئاواره‌كان بۆ شوێنه‌كانی خۆیان، ئه‌مه‌ش به‌پێی به‌رنامه‌یه‌ك كه‌ حكومه‌ت دایڕشتووه‌ بۆ داخستنی كه‌مپه‌كان و گه‌ڕاندنه‌وه‌ی ئاواره‌كان بۆسه‌ر ماڵ و حاڵی خۆیان، بۆ ئه‌وه‌ش هه‌ڵمه‌ته‌كانمان بۆ گه‌ڕاندنه‌وه‌ی ئاواره‌كان و چۆڵكردنی كه‌مپه‌كان ده‌ستپێكردووه‌.

ئاماژه‌ی به‌وه‌شداوه‌ وه‌زاره‌ته‌كه‌یان سه‌ركه‌وتنی باشی به‌ده‌ستهێنانه‌وه‌ له‌ داخستنی كه‌مپه‌كان و گه‌ڕاندنه‌وه‌ی ئاواره‌كان بۆ شوێنه‌كانی خۆیان، ده‌شڵێت: كه‌مپه‌كانی ئاواره‌ عیراقییه‌كان له‌ هه‌رێمی كوردستان، ژماره‌یان 26 كه‌مپه‌و له‌ژێر چاودێری و به‌ڕێوه‌بردنی به‌رپرسانی هه‌رێمدان، به‌ڵامد به‌رپرسانی هه‌رێم رێگرن دروستده‌كه‌ن له‌ گه‌ڕاندنه‌وه‌ی ئاواره‌كانی ناو كه‌مپه‌كانی ئه‌و سنووره‌، به‌ تایبه‌ت وه‌زیری ناوخۆی هه‌رێم رێگرییه‌كی زۆریكردووه‌ له‌داخستنی كه‌مپه‌كان و گه‌ڕاندنه‌وه‌ی ئاواره‌كان بۆ سه‌رماڵ و حاڵی خۆیان، بیانووه‌كانی وه‌زاره‌تی ناوخۆی هه‌رێمیش بۆ رێگری له‌گه‌ڕانه‌وه‌یان مه‌نتیقی و باوڕپێكراو نییه‌، بۆیه‌ وه‌زاره‌تی ناوخۆی هه‌رێم رێگره‌ له‌به‌رده‌م گه‌ڕانه‌وه‌ی ئاواره‌كان وداخستنی كه‌مپه‌كان، ئه‌م رێگرییانه‌ی وه‌زاره‌تی ناوخۆی هه‌رێمیش بۆ هێشتنه‌وه‌ی ئاواره‌كانه‌ له‌و ناوچانه‌و به‌كارهێنانیانه‌ بۆ مه‌رامی سیاسی له‌ كاتی هه‌ڵبژاردنه‌كاندا.

PUKmedia