وه‌زاره‌تی ته‌ندروستی: له‌ سلێمانی حاڵه‌تی نه‌وه‌ی نوێی كۆرۆنا تۆمار نه‌كراوه‌

.

بریكاری وه‌زاره‌تی ته‌ندروستی هه‌رێم وێڕای پشتڕاستكردنه‌وه‌ی هه‌واڵی تووشبوونی 5 هاووڵاتی هه‌رێم به‌ نه‌وه‌ی نوێی كۆرۆنا ڕایگه‌یاند له‌ چه‌مچه‌ڵیش حاڵه‌ت هه‌یه‌، به‌ڵام گومانلێكراوه‌.

د. ڕه‌هێڵ فه‌ریدوون له‌ كۆنفرانسێكی ڕۆژنامه‌وانیدا له‌ سلێمانی ڕایگه‌یاند: پێشتر چه‌ند حاڵه‌تێكی گومانلێكراو به‌ نه‌وه‌ی نوێی كۆرۆنا هه‌بوو، به‌ڵام ئه‌مڕۆ پشكنینه‌كان ده‌ریانخست كه‌ 5 حاڵه‌تی تووشبوون به‌ نه‌وه‌ی نوێی كۆرۆنا له‌ هه‌ولێر هه‌یه‌.

وتیشی: له‌ شاره‌كانی دیكه‌ جگه‌ له‌ چه‌مچه‌ماڵ حاڵه‌تی نه‌وه‌ی نوێی كۆرۆنا نییه‌ و حاڵه‌ته‌كانی چه‌مچه‌ماڵیش تا ئه‌م كاته‌ گومانلێكراوه‌.

بریكاری وه‌زاره‌تی ته‌ندروستی ئاماژه‌ی به‌ دوو تایبه‌تمه‌ندی نه‌وه‌ی نوێی كۆرۆنا كرد و وتیشی: نیشانه‌كانی نه‌وه‌ی نوێی كۆرۆنا  هه‌ر وه‌ك نیشانه‌كانی كۆرۆنای پێشووه‌، ته‌نها له‌ دوو حاڵه‌تدا نه‌بێت ئه‌ویش ئه‌مه‌یه‌ نیشانه‌كانی نه‌وه‌ی نوێی كۆرۆنا خێراتر ده‌رده‌كه‌وێت و بڵاو ده‌بێته‌وه‌ و هاوكاتیش له‌ خوار ئه‌و ته‌مه‌نه‌ی كه‌ ساڵی پار له‌ هه‌رێمی كوردستان بڵاوكرایه‌وه‌ له‌ نێوان 30 بۆ 39 ساڵ ، به‌ڵام نه‌وه‌ی نوێی كۆرۆنا له‌سه‌ر ته‌مه‌نی كه‌متریش كاریگه‌ری ده‌بێت.

سه‌باره‌ت به‌ ئه‌گه‌ری قه‌ده‌غه‌ی هاتووچۆ پاش ئه‌وه‌ی كه‌ حاڵه‌تی نه‌وه‌ی نوێی كۆرۆنا تۆمار كرا وتیشی: له‌ ئێستادا قه‌ده‌غه‌ی هاتووچۆ به‌ڕێوه‌ ناچێت.

له‌باره‌ی دابه‌شكردنی ڤاكسینی كۆرۆنا وتیشی: بڕیاره‌ تا هه‌فته‌ی یه‌كه‌می مانگی ئازار ڤاكسینی كۆرۆنا بگاته‌ هه‌رێمی كوردستان و سه‌ره‌تا به‌و كه‌سانه‌ ده‌درێت كه‌ له‌ نه‌خۆشخانه‌ و سه‌نته‌ره‌ پزیشكییه‌كان كار ده‌كه‌ن و هه‌روه‌ها به‌ به‌ساڵاچوان و ئه‌و نه‌خۆشخانه‌ی كه‌ نه‌خۆشی درێژخایه‌نیان هه‌یه‌، ده‌درێت.

PUKmedia  تایبه‌ت