جێگری سه‌رۆكی لیژنه‌ی مافی مرۆڤ له‌ په‌رله‌مانی كوردستان رایگه‌یاند، له‌لایه‌ن سه‌رۆكی لیژنه‌ی مافی مرۆڤ و هێزه‌ئه‌منییه‌كانی هه‌ولێره‌وه‌ رێگه‌مان پێنادرێت سه‌ردانی زیندانیانی بادینان بكه‌ین، لەكاتێكدا  ده‌زانین كه‌ ته‌ندروستی زیندانییه‌كان باش نیه‌.

 له‌و باره‌یه‌وه‌ گوڵستان سه‌عید جێگری سه‌رۆكی لیژنه‌ی مافی مرۆڤ له‌په‌رله‌مانی كوردستان به‌ PUKmediaی راگه‌یاند: له‌گه‌ڵ چه‌ند ئه‌ندامێكی لیژنه‌ی مافی مرۆڤ دوو رۆژه‌ ده‌مانه‌وێت سه‌ردانی زیندانیانی بادینان بكه‌ین، به‌ڵام له‌گه‌ڵ له‌لایه‌ن خودی لیژنه‌كه‌مان و هێزه‌ ئه‌منییه‌كانی هه‌ولێره‌وه‌ رێگه‌مان پێ نادرێت، هه‌روه‌ها زانیاریمان هه‌یه‌ كه‌ ته‌ندروستی زیندانییه‌كان باش نیه‌و شوێنی زیندانیكردنیان زۆر سارده‌و بێ خزمه‌تگوزارییه‌.

وتیشی: رۆژی دادگایی كردنی زیندانییه‌كانی بادینان ئێمه‌ له‌وێ ئاماده‌بووین، به‌سه‌رۆكی لیژنه‌كه‌شمان وتووه‌ كه‌ له‌گه‌ڵمان بێت، به‌ڵام ئه‌و ره‌تیكرده‌وه‌و له‌گه‌ڵمان نه‌هات.

ئه‌وه‌شی خسته‌ڕوو: ئه‌ركی په‌رله‌مانه‌ چاودێری ده‌زگا شه‌رعییه‌كانی هه‌رێمی كوردستان بكات، به‌ڵام ئه‌و ئه‌ركه‌مان لێوه‌رگیراوه‌ته‌وه‌.
ئاماژه‌ی بۆ ئه‌وه‌شكرد، له‌كاتی دادگایی كردنی زیندانیانی بادینان، بێ گه‌ڕانه‌وه‌ بۆ دادوه‌ر، هێزه‌ ئه‌منییه‌كان كه‌سی یه‌كه‌م كه‌لێدوانی لێوه‌رگیرا له‌دادگا برایه‌ ده‌ره‌وه‌و هێزه‌ ئه‌منییه‌كان له‌بری دادگا بڕیاریان ده‌دا.

له‌كۆتایی وته‌كانیدا جێگری سه‌رۆكی لیژنه‌ی مافی مرۆڤ له‌ په‌رله‌مانی كوردستان وتی: داواكارین له‌دادگای تێهه‌ڵچوونه‌وه‌ بڕیاری دروست له‌سه‌ر ئه‌و زیندانیانه‌ بدات، چونكه‌ ئه‌وان نه‌ تیرۆرستن و نه‌ سیخوڕن، هیچ به‌ڵگه‌یه‌ك له‌سه‌ریان نیه‌و ته‌نها گله‌یی و گازنده‌یان له‌حكومه‌ت كردوه‌ كه‌ ئه‌وه‌ش مافی هه‌موو تاكێكه‌ له‌هه‌رێمی كوردستان.

PUKmedia تایبه‌ت