به‌دیلی ئازادی، هه‌ر ئازادییه‌

.

دادگاییكردنی ئه‌و چه‌ند چالاكوانه‌ی بواری ڕۆژنامه‌گه‌ری و كۆمه‌ڵگه‌ی مه‌ده‌نی، به‌م شێوه‌یه‌، پێشینه‌یه‌كی خراپه‌ و زه‌نگێكی مه‌ترسیداره‌، هه‌موان، به‌لایه‌نه‌ سیاسییه‌كانیشه‌وه‌ ده‌خه‌نه‌ به‌رده‌م به‌رپرسیارییه‌تێكی گه‌وره‌، بۆ؟
چونكه‌ ئه‌و تۆمه‌تانه‌ی ڕووبه‌ڕوویان كراونه‌ته‌وه‌، شایانی ئه‌و سزا قورسه‌ نین، ئه‌گه‌ر مه‌به‌ست و ئامانجێكی سیاسی له‌ پشته‌وه‌ نه‌بێت.
ده‌بوایه‌ له‌وبه‌شه‌ی كه‌ په‌یوه‌ندی به‌كاری ڕۆژنامه‌گه‌رییه‌وه‌ هه‌یه‌، په‌نا به‌ یاسای ٣٥ی یاسای ڕۆژنامه‌گه‌ری له‌ كوردستان ببه‌سترابوایه‌، ئه‌مه‌ له‌ كاتێكدا، به‌پێی بڕگه‌ی پێنجه‌م له‌ مادده‌ی هه‌شت، دوای تێپه‌ڕبوونی (٩٠) ڕۆژ له‌ مێژووی بڵاوكردنه‌وه‌ی،نابێ هیچ جۆره‌ ڕێكارێكی یاسایی له‌ به‌رامبه‌ر ڕۆژنامه‌نووس بگیرێته‌ به‌ر.
هه‌روه‌ها له‌ بڕگه‌ی پێنجی مادده‌ی یه‌كه‌مدا هاتوه‌: ڕۆژنامه‌نووس به‌و كه‌سه‌ ده‌وترێت كه‌ له‌ بواری ڕۆژنامه‌گه‌ریدا، له‌ هه‌ر كه‌نالێكی ڕاگه‌یاندن كار بكات.
بۆیه‌ ئه‌ندام نه‌بوون له‌ سه‌ندیكا، ئه‌وه‌ ناگه‌ێنێ كه‌ ئه‌و كه‌سه‌ ڕۆژنامه‌نووس نییه‌، كه‌ دادوه‌ر ئه‌مه‌ی كردۆته‌ پێوه‌ر بۆ ئه‌و چه‌ند كه‌سه‌ سزادراوه‌.
ئه‌مه‌ جگه‌ له‌وه‌ی ئه‌و هه‌نگاوه‌ی دادگا جگه‌ له‌ له‌كه‌داركردنی سیمای هه‌رێمی كوردستان له‌ ده‌ره‌وه‌، له‌سه‌ر ئاستی ناوخۆشدا هه‌نگاوێكی خراپه‌ بۆ زیاتر قولكردنه‌وه‌ی ناڕه‌زایه‌تییه‌كان و فراوانكردنی به‌ره‌ی دژه‌ ده‌سه‌ڵات، له‌ كاتێكدا ئه‌م هه‌رێمه‌ وه‌ك پێویست نه‌چه‌سپاوه‌ و له‌به‌رده‌م هه‌ڕه‌شه‌ی له‌به‌ین بردن و لاوزكردندا دایه‌.
ئاوڕدانه‌وه‌ش له‌ مێژووی ڕابردووی ڕوخانی ده‌سه‌ڵاته‌ یه‌ك له‌ دوای یه‌كه‌كانی كوردیش، ئه‌و ڕاستییه‌ نیشان ده‌ده‌ن، كه‌ به‌ هۆی نادیده‌گرتنی یه‌ك ڕیزی ناوخۆیی، ئه‌و سته‌مه‌ی ده‌سه‌ڵات له‌ خه‌ڵكه‌كه‌ی كردوه‌، هه‌میشه‌ به‌شێكی كورد به‌شێك بووه‌ له‌و هێزه‌ی كه‌ هه‌وڵی ڕوخانی ئه‌و ده‌سه‌ڵاته‌ی كوردی داوه‌، هه‌ر له‌ ڕوخانی  میرنشینه‌ كوردییه‌كانه‌وه‌ بگه‌ر تا ده‌گاته‌ كۆماری مهاباد.
بۆیه‌ باشتر وایه‌ دۆسییه‌ی ئه‌و سزادراوانه‌ پێداچوونه‌وه‌ی پێدا بكرێ و هه‌ڵه‌كان ڕاست بكرێنه‌وه‌.
باشتریش وایه‌ له‌و ڕوانگه‌یه‌وه‌ سه‌یری ئه‌و مه‌سه‌له‌یه‌ بكرێ، نه‌ك له‌ ڕوانگه‌ی جولاندنی هه‌ست و سۆزه‌وه‌.....

سمكۆ عه‌بدولكه‌ریم

PUKmedia تایبه‌ت