مەراسیمی كۆڕیادی شیهاب عوسمان هاوڕێ و هاوپیشەمان بەڕێوەدەچێت

.

لەمەكتەبی رایگەیاندنی یەكێتییی نیشتمانیی كوردستان مەراسیمێكی تایبەت بۆ كۆچكردو شیهاب عوسمان پێشمەرگەی دێرین و نوسەرو رۆژنامەنوس و پەیامنێری PUKmedia بەڕێوەچوو.

لەمەراسیمەكەدا كەسوكاری كۆچكردو لێپرسراوانی حكومی و حزبی و هاوڕێیانی و نوسەران و رۆژنامەنوسان ئامادەبوون و  پێشانگایەكی وێنەیی كۆچكردو كرایەوەو نامیلەكەیەكیش كە بۆ چلەكەی ئامادەكرابوو پێشكەشی ئامادەبووان كرا.

هەر لەو مەراسیمەدا ستران عەبدوڵڵا نوسەرو رۆژنامەنوس سەرپەرشتیاری مەكتەبی راگەیاندنی یەكێتی وتەیەكی پێشكەشكردو تیایدا باسی لەژیان و بەرهەمەكانی و رۆڵی شیهاب عوسمان كرد كە لەسەرەتای خەباتی نهێنی كۆمەڵەی رەنجدەرانی كوردستان و دواتریش كە چوەتە شاخ و وەك پێشمەرگەو نوسەرو رۆژنامەنوس لەشاخ لەناو ریزەكانی یەكێتی و راگەیاندنی یەكێتیدا كاریكردوە.

وتیشی: راگەیاندنی یەكێتی نوسەرو رۆژنامەنوس و قەڵەمێكی ئازادی لەدەستدا، لێرەوە جارێكی تر هاوخەمی خۆمان بۆ كەسوكارەكەی دووپاتدەكەینەوە.

دواتریش یاسن عوسمان بەناوی بنەماڵەی كۆچكردو سوپای مەكتەبی راگەیاندنی یەكێتیی نیشتمانیی كوردستان و نوسەران و رۆژنامەنوسان و لێپرسراوانی حكومی و حزبی كرد كە هەر لەگەڵ كۆچی دوایی شیهاب عوسماندا بەردەوام لەگەڵیان بوون تا گەڕانەوەی تەرمەكەیی و مەراسیمی بەخاكسپاردن و دواتریش ئەنجامدانی مەراسیمی چلەكەی كە رێزیان لەنوسەرو رۆژنامەنوسەكەی هاوڕێیان گرتوەو ئەو مەراسیمەیان بۆ رێكخستوە.

شیهاب عوسمان پێشمەرگەی دێرن و نوسەرو رۆژنامەنوس و پەیامنێری PUKmedia رۆژی 3ی 1ی 2021 بەهۆی كاریگەری توشبوون بەكۆرۆنا لەیەكێك لەنەخۆشخانەكانی ئەڵمانیا كۆچی دوایی كردو دواتر تەرمەكەی گەڕێنرایەوە سلێمانی و لەگۆڕستانی شێخ محێدن لەمەراسیمێكدا بەخاكسپێردرا.

PUKmedia تایبەت