كۆنفرانسی رۆڵی ژن لە كایە سیاسییەكان و دام و دەزگا حكومییەكان بەڕێوەچوو

.

كۆنفرانسی (رۆڵی ژن لە كایە سیاسییەكان و دام و دەزگا حكومییەكان) بە سەرپەرشتی مەڵبەندی 1ی رێكخستنی سلێمانی  ئەنجامدرا و تێیدا چەند پانێڵێك پێشكەشكران.

سەعات 10ی سەرلەبەیانی ئەمڕۆ چوار شەممە 10-2-2021، بە ئامادەبوونی پارێزگاری سلێمانی و سەرۆكی ئەنجومەنی پارێزگای سلێمانی و لێپرسراوی مەڵبەندی 1ی رێكخستنی سلێمانی و ژمارەیەك بەرپرسی حكومی و حزبی، لە هۆڵی تەلاری خێزانی لە سلێمانی كۆنفرانسی (رۆڵی ژن لە كایە سیاسییەكان و دام و دەزگا حكومییەكان) بە سەرپەرشتی مەڵبەندی 1ی رێكخستنی سلێمانی، لە لایەن بۆردی ژنانی ئەكادیمی بە هەماهەنگی یەكێتی ژنانی كوردستان لقی سلێمانی بەڕێوەچوو.

كۆنفرانسەكە بە دەقیقەیەك وەستان بۆ گیانی پاكی شەهیدان و قوربانیانی توند و تیژی و ژنانی ئێزدی دەستیپێكرد و بەناز رەمەزان بەڕێوەبەری بۆردی ژنانی مەڵبەندی 1ی رێكخستنی سلێمانی و بەڕێوەبەری كۆنفرانسەكە وتارێكی خوێندەوە و رایگەیاند: ژنان كە نایەنە پێشەوە و بەشداری كایەسیاسییەكان ناكەن كێشەیان هەیە و ئەمڕۆ بە پێشكەشكردنی چەند توێژینەوەیەك دەست دەخەینە سەر ئەو كێشانە.

هاوكات جەزای سەید مەجید لێپرسراوی مەڵبەندی 1ی رێكخستنی سلێمانی وتەیەكی پێشكەشكرد و رایگەیاند: رێكخستنی كۆنفرانسێكی لەم شێوەیە سەلمێنەری ئەوەیە كە ژنان رۆڵی گرنگیان هەیە لەسەرجەم كایەكاندا و سەرۆك مام جەلالیش داكۆكیكاری سەرسەختی ژنان بووە، بۆیە ئەولەویەتی كارەكانی یەكێتیی نیشتمانیی لە دوای كۆنگرە هێنانە پێشەوەی ژنانە بۆ كایە سیاسی و پێگە هەستیارەكان.

د. هەڤاڵ ئەبوبەكر پارێزگاری سلێمانی رایگەیاند: پێویستە لەسەر بنەمای هاووڵاتی بوون و سەروەری یاسا نێر و مێی لە كۆمەڵگە و حزب و دەسەڵات بێنینە دەرەوە و جارێكی دیكە كۆمەڵگەیەكی هاوسەنگ دروستكەین.

لینكی یارمەتیدەر بۆ بینینی كۆنفرانسەكە...

PUKmedia تایبەت

فۆتۆ.. جەعفەر جەلالی