نابڕێته‌وه‌ ئه‌م په‌ژاره‌ی شوباته‌و ئه‌م ڕاسته‌ شه‌قامه‌ی رێی نه‌جاته‌

.

چه‌ند باسی بكه‌ین ئه‌م خه‌مه‌ كۆتایی نایه‌ت ، ئه‌م په‌ژاره‌یه‌ نابڕێته‌وه‌. چونكه‌ شریته‌كه‌ لێ ناده‌ینه‌وه‌، چونكه‌ كه‌ لێشی ده‌ده‌ینه‌وه‌ لێی ده‌قرتێنین ، یان چاوی لێ ده‌نوقێنین و دواییش بۆی ده‌قوچێنین . ئێمه‌ ھه‌مووجار خۆمان له‌ كۆی دیمه‌نه‌كه‌ نه‌بان ده‌كه‌ین . رۆژنامه‌كانمان ھه‌ر ئه‌لبومی ناوه‌كانی خۆمان به‌سه‌ر ده‌كه‌نه‌وه‌ و ھه‌ر ته‌رمی شه‌ھیده‌كانی خۆمان ده‌نێژن و  ھه‌ر ئه‌لفابێتای سیانی خۆمان حونجه‌ ده‌كه‌ین  و ھه‌ر زامی سارێژنه‌بووی خۆمان ده‌لاوێنینه‌وه‌ و ھه‌ر زامی یه‌كتری ده‌كولێنینه‌وه‌. 

قه‌ت رۆژێك به‌دیار كۆی دیمه‌نه‌كه‌وه‌ ، كۆی لیستی شه‌ھیده‌كانه‌وه‌ ڕانه‌ماین و ڕانه‌چڵه‌كین و ڕانه‌وه‌ستاین،  بۆیه‌ ھه‌ر رانه‌بووینه‌وه‌ و له‌خه‌وی غه‌فله‌ت به‌ خه‌به‌ر نه‌ھاتینه‌وه‌.

ئێمه‌ دوای ئه‌نفالیش به‌ڵێنی ره‌نگاوره‌نگی ئاشتبوونه‌وه‌ی گشتیمان دا ، دوای ھه‌ڵه‌بجه‌ و كۆڕه‌ویش وتمان چاك  و باش ، برای شیریین و  گشتمان یه‌كین و له‌كین. دوای به‌ره‌ی كوردستانیش به‌ڕه‌یه‌كمان له‌ شكستی ده‌یان ساڵه‌ دادڕی و كراسی نه‌دامه‌تمان كرده‌به‌ر ، دوایی وتمان ته‌نھا و ته‌نھا  جه‌وله‌یه‌كی كورتی براكوژییه‌و ئیتر خوشك و برا له‌ سایه‌ی یه‌ك ئازار و یه‌ك ئازادی ده‌حه‌وێنه‌وه‌. كه‌چی گێمی خوێن زۆری خایاند و كاتی زیاده‌شی برد و ھه‌ر ئه‌و كاتانه‌ سه‌رخه‌وێكمان شكاند  كه‌ پشووی جه‌نگاوه‌ر سه‌ری كرده‌ سه‌رمان.  دوای ئه‌م شوباته‌ش خوێن و خوێ و فرمێسك وا تێكه‌ڵ بوون كه‌ خه‌ریك بوو نوێژی جه‌ماعه‌ت و گۆڕی به‌كۆمه‌ڵ بمانگرێته‌ خۆ. 

ئه‌م شوباته‌ خه‌م و په‌ژاره‌ی به‌ به‌رچاوی دونیاوه‌بوو كه‌ ئیتر عه‌یببوو ئه‌م عاری په‌رتی وكه‌رتییه‌ بمێنێته‌وه‌و چاره‌یه‌كی لێ نه‌كه‌ین. ده‌بوو دوای ئه‌م جه‌ژنه‌ خوێناوییه‌ كوردایه‌تی خۆی بچێته‌ چاكوخۆشی كورده‌واری و  نوقل و شیرینی ده‌سكه‌وتی بكردایه‌ته‌ گیرفانی منداڵانی شه‌ھید،  كه‌چی وا نه‌بوو ، ئینی تاس ئینی حه‌مام بووه‌ قه‌ده‌ری دووباره‌.

كێ له‌ شه‌ھیدانی شوبات پێشبینی ده‌كرد دوای دوعاخوازیان دوو پارچه‌ ده‌بێته‌ چه‌ندی تر و یه‌كێتی ریزه‌كان ده‌بێته‌ كۆدی ھه‌ژموونی ناره‌وا كه‌ به‌ڵای سه‌ری ئه‌زموونێكی جێی چاوه‌ڕوانی سه‌د ساڵه‌یه‌ ؟

كێ له‌ جوامێره‌كانی شوباتی ئه‌و ساڵه‌ وا دیموكراسییان شرۆڤه‌ ده‌كرد كه‌ یه‌كسان بێت به‌ پۆلپۆلیستی و قیژه‌ و قه‌ره‌باڵه‌غی و كێ له‌وان وا وێنای نیشتمانی ده‌كرد كه‌ بریتی بێت له‌ كۆدی بانك و بۆڕی نه‌وت و بژارده‌ی چه‌وت؟

كه‌ شوبات خه‌رجی خوێنی دا كێ به‌و نرخه‌ی كڕی كه‌ میلله‌ت بێ مووچه‌ و بێ بودجه‌ بێت ؟  له‌وه‌ش  خراپتر بێ ئومێد بێت كه‌ له‌ ده‌ورانی كه‌م ده‌ره‌تانی راپه‌ڕیندا ئومێد وا تێری سك و  گه‌ده‌ و ئاتاجی ده‌كردین قه‌ره‌بووی گه‌مارۆی به‌غدای به‌عسی به‌ زیاده‌وه‌ بوو ، چونكه‌ له‌ به‌رواری  یه‌كبوونیدا له‌ خه‌م و خولیادا یه‌كسان بووین،   سه‌ری به‌رز ھه‌ر خۆی به‌ خۆرسكی بۆ مووچه‌ نه‌وی نه‌ده‌بوو  چونكه‌ سه‌ری خه‌مخۆری ھه‌بوو . 

ئێمه‌ په‌یمانمان به‌ جه‌ژنی شوبات دا قوربانییه‌كانی بكه‌ینه‌ بیانوی سه‌ره‌خۆشی  و بۆنه‌ی په‌رۆشی. فه‌قه‌ت  نیشانه‌ به‌وه‌ی وا نه‌بوو وا زۆره‌ وه‌ك نیشانه‌كانی ئاخر زه‌مان كه‌ ئاخری خێربێت ئه‌گه‌ر به‌تینوتاوی دوا وزه‌ نه‌چینه‌وه‌ ڕاسته‌ شه‌قامی رێی نه‌جات.

.

سڵاو له‌ رۆحی شه‌ھیده‌كان كه‌ جێی دروودن، لێ زیندووه‌كان ھه‌ر بارمته‌ن تا كلیلی گومبووی چاره‌سه‌ر ده‌دۆزرێته‌وه‌.

 با ئومێد له‌ ناو قوڕو لیته‌ی شۆك ده‌ربێنین و تۆزێك تۆزی لێ ھه‌ڵسێنین . بۆ ئه‌مه‌ش ته‌داروكمان گه‌ره‌كه‌ نه‌ك رێكه‌وت و چانس و فه‌ردا به‌ ده‌ھا.

نوسینی / ستران عه‌بدوڵلا 

PUKmedia تایبه‌ت