گرینگە کورد ئەوە بکات ؟؟

30/1/2021 09:30:00

چاپ کردن

بە وێنەوە

.

وەک چاوەڕوان دەکرا لەگەڵ دەست بەکاربوونی بایدن لە کۆشکی سپی ژمارەیک بڕیاری هەڵە و دوور لە بەرژەوەندی و پلان و ستراتیژی ئەمەریکا بەگشتی هەڵوەشێنێتەوە یان ڕایبگرێت لە چەند ڕۆژی ڕابردوو ئەم ڕاستیاشەمان بە چاوی خۆمان بینی ، کەواتە ئیدارەی کۆشکی سپی لە هەندێک ڕووەوە بەخۆیدا دەچێتەوەو گۆڕانکاری بەرچاو دیار بەدی دەکرێ لە ئیدارەی جۆبایدن بە بەراورد بە چوار ساڵی ڕابردووی تڕەمپ ، ڕەنگە هەموو گۆڕانکارییەکان پەیوەست نەبێ بە سیاسەت و پلانی دەرەوەی ئەمەریکا بەڵام بێ گومان ڕۆژهەڵای ناوەڕاست و عێراق و دەورووبەری بەشێکی گرینگ و گەرم و گوڕی ئەم گۆڕانکاریانە دەبێ لە بەرنامە و ئیدارەی تازەی کۆشکی سپی ، لە ماوەی چوار ساڵی ڕابردوودا کورد بەگشتی سوود مەند نەبوو لە سیاسەتی بەرژەواندخوازوو هەڵپەرستی تڕەمپ کە هەندێکیشیان ڕەنگە خۆی هۆکار بووبێ بەڵام نەک هەر ئەم سێ پارچەی کوردستان ( باکور و باشوور و ڕۆژئاوا ) تەنانەت کوردانی پارچەی ڕۆژهەڵاتیش کە بەحیساب تڕەمپ زۆر دژی تاران و ڕژێمەکەیەتی و هەوڵی لاوازبوونی ڕووخانی دەدات بەڵام ئەوانیش نەک هەر سوود مەند نەبوون بەڵکو نەتوانرا خشتێک بخەنە سەر دیواری خەبات و تێکۆشایان لە ڕۆژهەڵاتی کوردستان و ئێرانیشدا ،

ئەوەی لێرەدا مەبەستەو ئەسڵی بابەتەکەیە ئەوەیە مادام ناوچەکە بەگشتی و کورد بەتایبەت چاوەڕوانی گۆڕانکاری گەورەو کاریگەر دەکات لە سیاسەتی ئەمەریکا لەناوچەکە لە کاتێکدا بەکردەوەش کۆمەڵێ بڕیار و گۆڕانکریمان بینی ئیتر کاتی ئەوەیە ناوچەکەش بەگشتی و کورد بەتایبەت ئاوڕێک لە خۆی بداتەوەو بتوانێ سوود لەم گۆڕانکاری و دەرفەتە تازەیە وەربگرێ و بەرژەوەندی خۆی لەگەڵ سیاسەت و بەرژەوەندیەکانی ئەمەریکا لەناوچەکەدا هاوتەریب و گرێ بدات و هەڵسوکەوت و کار و بڕیارەکانی خۆی ڕێکبخاتەوە ،

بەبڕوای بەندە لەبەر ئەوەی بابەتی کورد لە ئێستادا دوو ڕەهەندی گرینگ و هەستیاری لەخۆ گرتووە پێویستە کورد لەسەر بە دوو ئاڕاستە کاربکات ،

یەکەم / ڕەهەندی بەرژەوەندی گشتی نەتەوەیی :

ئەم پێویستیە گرینگە ئەوەمان لێ دەخوازێ کار بەکەین یان هەوڵ بدەین بۆ بەەست هێنانی یەکێتی نەتەوەیی و یەکڕیزی و بەرژەوەندی نیشتمانی بۆ ناساندن و بەرەوپێشبردنی زیاتری دۆزی ڕەوای نەتەوەیمان و بەیەکەوە گرێدانی بەرژەوەندییە گشتیەکان و هەوڵدان و کارکردن بۆ سازدانی کۆنگرەیەکی نەتەوەیی زانستی و ئەکادیمی لەسەر ئاستی کورد و کوردستانیان بەگشەتی و داڕشتنی پلان و بەرنامەو کارکردن لەگەڵ گۆڕانکارییەکانی ناوچەکەو سیاسەتی تازەی نێودەوڵەتی لەناوچەکەدا لە کاردابین ، ئەمەش لەپێناو بەهێزبوون و کاریگەرتر بوونی پرسە ڕەواکەمان و نەهێشتی هیچ دەرفەت و کەلێنێک بۆ داگیرکەران و نەیارانمان ، هەروەها بۆ لە گۆڕنان و پووچەڵکردنەوەی کۆبونەوەو ڕێکەوتنە ژێربەژێر و ئاشکراکانی هەر سێ و چوار دەوڵەتی داگیرکەری کوردستان و نەهێشتەوەی هیچ دەرفەت و درزێک بۆ دوژمنانی گەلەکەمان بۆ ئەم مەبەستەش بەبڕوای من کۆنگرەی نەتەوەیی کوردستان ( KNK ) بەهاوکاری لایەنە سیاسیە سەرەکیەکانی کوردستان و دڵسۆزان ڕۆشنبیرو توێژەر و ڕووناکبیر و ئەکادیمیەکانی کورستان دەتواندرێ ئەم ئامانجە پیرۆز و گرینگە بەدەست بێت و سەرکەوتنێکی گەورەو مێژوویی بۆ نەتەوەکەمان تۆماربکرێ و کاریگەرییە ئەرێنیەکانیشی لە زووترین کاتدا بەدی بکرێ ،

دووەم / ڕەهەندی سیاسی و خۆ بەڕێوەبەری :

لەبەر ئەوەی لە دوو پارچەی کوردستان ( باشوور و ڕۆژئاوا ) بەجۆرێک لە جۆرەکان و بەشێک لە خاکی ئەم دووپارچەیە ئازادکراوەو ( خۆبەڕێوەبەری ) تیایدا بوونی هەیە و ئەمەریکاش بەئاشکراو بەهێزەوە لە عێراق و سوریا بوونی هەیەو ئەجنداو پلان و بەرژەوەندی قوڵ و ستراتیژی خۆی هەیە و کاری لەسەر دەکات ، بۆیە پێویست دەکات بەڕێوەبەرانی ئەم دوو پارچەیە پەیوەندی و هاریکاری نێوانیان بەهێزتر بکەن و کۆنفڕانسێکی سیاسی و ئیداری ببەستن لە پێناوی زیاتر ڕاکێشانی سەرەنج و بەهێزترکردنی پەیوەندی لەگەڵ هاوپەیمانان و بەتایبەت ئەمەریکا ، ئەمەش خۆی دەنوێنێ لە بوارەکانی خۆڕێکخستنەوەی دەسەڵات و کارکردن بۆ بەیموکراتیزەکردنی کۆمەڵگاو شەفایەت و ئازادی ڕادەربڕین و دادپەروەری کۆمەڵایەتی و ڕێکخستنەوەو توندو تۆڵکردنی هێزی سەربازی و ئاسایش و هەواڵگەری و گۆڕینەوەی زانیاری و ئەزموون و پشتیوانیکردن لەیەکتری لە هەموو ڕوێکەوە ئەمەش دەبێتە هۆی گەڕانەوەی متمانەی خەڵک بە دەسەڵات و یەکڕیزی نەتەوەیی و بەهێزی لایەنی سەربازی و ئەمنی و جێگای سەرەنج و ڕەزامەندی دۆستەکانمان و هاوپەیمانان و بەتایبەت ئەمەریکیەکان کەوا هەمیشە داواو خواستی ئەوان ئارامی ناوچەکەو یەکڕیزی و بەهێزی ئەم دوو پارچەی کوردستان بوە لەگەڵ ئەوەشدا ئەمڕۆ تاکە دۆست و هاوپەیمانە بۆ کورد لەناوچەکەو جیهاندا کە لە هەردوو پارچەکەشدا بوونی هەیە ، لە هەمانکاتدا پێویستە ئەوەش بیرخۆمان بهێنینەوە لەکاتی دەرچوونمان لە بڕیار و پێشنیار و داواکانی هاوپەیمانان بەتایبەت ئەمەریکا و یاخود دژوەستانەوەیان و حیساب بۆ نەکردیان چی زیانێکی گەورەو ماڵوێرانی بەدوای خۆیدا دەهێنێ و بۆ ئەمەش لە ڕابردوودا باشوور ئەم ڕاستییەی بەچاوی خۆی بینی ، بێ گومان بۆ کارێکی وا گرینگ و پێویستەش دووبارە هەم KNK لەسەر ئاستی ناوخۆ و وە هەم هاوپەیمانان بەتایبەت ئەمەریکا لەسەر ئاستی دەرەکی دەتوانن بەم ڕۆڵە گرینگە و پێویستە هەڵبستن و هاریکاربن ، دڵنیاشم لە خۆشحاڵی و پێشوازی گەرمی ئەوان لە کارێکی لەم چەشنەدا ....

ئازاد جۆڵا / هەولێر

‌