ته‌ندروستی عیراق هۆشداری توند ده‌دات

.

وه‌زاره‌تی ته‌ندروستی و ژینگه‌ی عیراق هۆشداری ده‌دات له‌ سه‌رهه‌ڵدانی شه‌پۆلێكی تری قورسی ڤایرۆسی كۆرۆنا له‌سه‌رجه‌م وڵات.

وه‌زاره‌تی ته‌ندروستی و ژینگه‌ی عیراق له‌ به‌یاننامه‌یه‌كدا هۆشداری ده‌دات له‌ هاتنی شه‌پۆلێكی نوێی مه‌ترسیداری ڤایرۆسی كۆرۆنا، بۆیه‌ش وه‌ك وه‌زاره‌تی ته‌ندروستی به‌رپرسیارێتییه‌كی نیشتمانی له‌سه‌ریه‌تی كه‌ هاووڵاتییان عیراق هۆشیاربكاته‌وه‌ له‌ هه‌ر مه‌ترسییه‌ك له‌باره‌ی ته‌ندروستی و ژینگه‌وه‌ رووبه‌ڕویان ببێته‌وه‌.

وه‌زاره‌تی ته‌ندروستی و ژینگه‌ی عیراق راشیگه‌یاندووه‌، به‌هۆی به‌رزبوونه‌وه‌ی رێژه‌ی توشبوون به‌ ڤایرۆسی كۆرۆنا له‌ زۆرێك له‌ وڵاتانی دونیا و خۆگۆڕینی ڤایرۆسه‌كه‌ له‌ چه‌ند وڵاتێك، بۆیه‌ رێكخراوی ته‌ندروستی جیهانی هۆشداری توند ده‌دات، له‌به‌ر ئه‌‌م هۆكارانه‌ی لای خواره‌وه‌:

یه‌كه‌م: كه‌مبوونه‌وه‌ی به‌رگری جه‌سته‌، هه‌روه‌ها تائێستا به‌ ته‌واوه‌تی نازانرێت ئه‌و كه‌سانه‌ی بۆ جارێك توشی ڤایرۆسه‌كه‌بوون و چاكبوونه‌ته‌وه‌، بۆ جارێكی تر توشده‌بنه‌وه‌ یان نا، بۆیه‌ پێویسته‌ به‌رده‌وامبین له‌ خۆپاراستن كه‌ له‌ ئێستادا له‌ عیراق تاكه‌ رێگه‌ چاره‌یه‌.

دووه‌م: خۆگۆڕینی ڤایرۆسی كۆرۆنا له‌ چه‌ند وڵاتێك ئه‌مه‌ش بۆ خۆی مه‌ترسییه‌كی تره‌، وه‌ك ئه‌وه‌ی له‌ به‌ریتانیا و باشوری ئه‌فریقا و به‌رازیل و ژاپۆن روویدا، كه‌ وایكرد به‌ خێراتر ڤایرۆسه‌كه‌ بڵاوبێته‌وه‌، ئه‌مه‌ش مه‌ترسیه‌كی تره‌و ئه‌گه‌رێكی زۆر نزیكه‌ كه‌ بگاته‌ عیراقیش له‌به‌ر ئه‌وه‌ی له‌و جۆره‌ گۆڕاوه‌ی ڤایرۆسه‌كه‌ له‌ چه‌ند وڵاتێكی دراوسێی عیراق تۆماركراوه‌.

سێیه‌م: پێویسته‌ بۆ رووبه‌ڕوبوونه‌وه‌و خۆپاراستن له‌ ڤایرۆسه‌كه‌ هاوكاریی و هه‌ماهه‌نگی ته‌واو له‌ نێوان سه‌رجه‌م ده‌زگاكانی حكومه‌ت و وه‌زاره‌تی ته‌ندروستیدا هه‌بێت تاكو پێكه‌وه‌ بتوانرێت رێگه‌ له‌ بڵاوبوونه‌وه‌ی ڤایرۆسه‌كه‌ بگیرێت و ژماره‌ی توشبووان به‌شێوه‌یه‌ك نه‌بێت كه‌ له‌ ده‌ست ده‌ربچێت و دواتر كاره‌ساتی لێبكه‌وێته‌وه‌.

چواره‌م: كردنه‌وه‌ی سه‌رجه‌م شوێنه‌ ئاینییه‌كان وه‌كو مزگه‌وت و كڵێساو گه‌ڕانه‌وه‌ی ژیانی ئاسایی بۆ فه‌رمانگه‌و بازاڕو شوێنه‌ گشتییه‌كان، ده‌بێته‌ هۆی دروستبوونی قه‌ره‌باڵغییه‌كی زۆر له‌و ناوچانه‌و پابه‌ند نه‌بوون به‌ رێنماییه‌ ته‌ندروستییه‌كان واده‌كات كه‌ مه‌ترسی گه‌وره‌ دروستده‌كات بۆ زیاتر بڵاوبوونه‌وه‌ی ڤایرۆسه‌كه‌.

PUKmedia راگه‌یاندنی وه‌زاره‌تی ته‌ندروستی و ژینگه‌ی عیراق