سەرۆك كۆمار:رێز لەسەروەری عیراق بگیرێت

.

لەمیانی پێشوازیكردنی لە وەزیری بەرگری توركیا، سەرۆك كۆمار جەختدەكاتەوە لە پێویستی كەمكردنەوەی گرژییەكانی ناوچەكەو رێزگرتن لەسەروەری و رەتكردنەوەی دەستوەردان و دەستدرێژییەكان.

د.بەرهەم ساڵح، سەرۆك كۆماری عیراق ئەمڕۆ 18ی 1ی 2021 لەكۆشكی بەغدا پێشوازیكرد لە خلوسی ئاكار وەزیری بەرگری توركیاو دەربارەی گۆڕانكاری و پێشهاتەكانی ناوچەكە و جیهان گفتوگۆكرا.

لەو دیدارەدا تاووتوێی پەیوەندییەكانی نێوان عیراق و توركیاو پەرەپێدانی ئاسۆی هاریكارییەكان لە بوارە جیاجیاكان كرا، بەپێی بەرژەوەندییە هاوبەشەكانی هەردوو وڵات و گەل، هاوكات جەختكرایەوە لە رێزگرتن لە سەروەری عیراق و پاراستنی ئاسایش و سەلامەتی خاكەكەی و رێگریكردن لەوەی عیراق ببێتە گۆڕەپانێك بۆ هێرشكردنە سەر هەر لایەنێك.

لە تەوەرێكی دیكەی دیدارەكەدا سەرۆك كۆمار جەختیكردەوە لەگرنگی كەمكردنەوەی گرژییەكانی ناوچەكە، پشتبەستن بەدیالۆگی بونیادنەر بۆ یەكلایكردنەوەی كێشە هەڵپەسێردراوەكان و بەهێزكردنی هاریكاری و هەماهەنگی هەرێمایەتی و درێژەدان بەجەنگ دژ بە تیرۆرو رێزگرتن لە سەروەری و رەتكردنەوەی دەستوەردان و دەستدرێژییەكان لەپێناو هێنانەكایەوەی سەقامگیری ئەمنی و ئابووری لە ناوچەكەدا.

لەلای خۆیەوە وەزیری بەرگری توركیا پشتیوانی وڵاتەكەی بۆ سەروەری و سەقامگیر عیراق دووپاتكردەوەو پابەندبوونی وڵاتەكەشی نیشاندا لە بەهێزكردنی هاریكاری و هەماهەنگی لەگەڵ عیراق، هاوكات ئاماژەشیكرد بەگرنگی كەمكردنەوەی گرژییەكان و بەكارهێنانی زمانی گفتوگۆ بۆ چارەسەركردنی كێشەكانی ناوچەكە.

PUKmedia راگەیاندنی سەرۆك كۆمار