ئه‌ردۆگان: بۆ به‌هێزكردنی كه‌رتی به‌رگری پرس به‌ كه‌س ناكه‌ین

.

سه‌رۆك كۆماری توركیا، سه‌باره‌ت به‌  به‌رنامه‌ی  فڕۆكه‌ی ئێف 35 هۆشداری ده‌داته‌ ئه‌مریكا، ڕاشیگه‌یاند، به‌مزووانه‌ له‌گه‌ڵ ڕووسیا گفتوگۆ له‌سه‌ر كڕینی كاروانی دووه‌می ئێس400 ده‌كه‌ن.

ڕه‌جه‌ب ته‌یب ئه‌ردۆگان سه‌رۆك كۆماری توركیا ڕایگه‌یاند: بۆ به‌هێزكردنی كه‌رتی به‌رگری وڵاته‌كه‌یان پرس به‌ كه‌س ناكه‌ن و ڕه‌نگه‌ له‌ كۆتایی ئه‌م مانگه‌شدا له‌گه‌ڵ ڕووسیا گفتوگۆ بكه‌ن له‌ باره‌ی به‌ده‌ستهێنانی كاروانێكی تری سیستمی موشه‌كی ئێس 400.

وتیشی، وڵاته‌كه‌ی پاره‌یه‌كی زۆری خستووه‌ته‌ نێو پڕۆگرامی په‌ره‌پێدانی فڕۆكه‌ی ئێف 35 له‌گه‌ڵ ئه‌مریكا، به‌ڵام تا ئێستا ئه‌و جۆره‌ فڕۆكه‌یه‌یان له‌لایه‌ن ئه‌مریكاوه‌ به‌ده‌ست نه‌گه‌شتووه‌ و ئه‌وه‌ش هه‌ڵه‌یه‌كی كوشنده‌یه‌ بۆ واشنتۆن. ڕاشیگه‌یاند، هیوادارن جۆ بایدن سه‌رۆكی نوێی ئه‌مریكا، له‌گه‌ڵ ده‌ستبه‌كاربوونی، ئه‌و گرفته‌ چاره‌سه‌ر بكات.

PUKmedia ئاژانسه‌كان