سه‌رله‌به‌یانی ئه‌مڕۆ شه‌ممه‌ 16-1-2021، له‌ باره‌گای مه‌كته‌بی سیاسی  له‌شاری هه‌ولێر، به‌ئاماده‌بوونی كارگێڕو ئه‌ندامانی مه‌كته‌بی سیاسی و سه‌ركردایه‌تی، ئه‌ندامانی سه‌ركردایه‌تی یه‌كێتی سنووری پارێزگای هه‌ولێر كۆبوونه‌وه‌.

‎له‌ كۆبوونه‌وه‌كه‌دا گفتوگۆ كرا له‌باره‌ی دۆخی هه‌رێمی كوردستان و ڕۆڵی یه‌كێتیی نیشتمانیی كوردستان له‌هاوكێشه‌ سیاسییه‌كان و گۆڕانكارییه‌كانی ناوچه‌كه‌، جه‌خت له‌گرنگی رۆڵی یه‌كێتی كرایه‌وه‌و ئاماده‌بووان هاوڕابوون كه‌ ده‌بێت یه‌كێتی ڕۆڵی سه‌ره‌كی بگێڕێت له‌ چاره‌سه‌ری كێشه‌كان و یه‌كلاكردنه‌وه‌ی قه‌یرانه‌كان.

‎به‌شێكی تری كۆبوونه‌وه‌كه‌ ته‌رخانكرا بۆ گفتوگۆكردن له‌باره‌ی دۆخی هه‌ولێرو هه‌وڵه‌كانی یه‌كێتی بۆ خزمه‌تكردن له‌و شاره‌، جه‌خت له‌وه‌كرایه‌وه‌ كه‌ ده‌بێ به‌بێ جیاوازی بیروڕای سیاسی و ئایدۆلۆژی خزمه‌تی هه‌ولێرو هه‌ولێرییه‌كان بكرێ.

‎په‌یوه‌ندی نێوان لایه‌نه‌ سیاسییه‌كان، ئاینده‌ی په‌یوه‌ندییه‌كانی نێوان هه‌رێم و به‌غدا، چاره‌سه‌ری كێشه‌ی مووچه‌و دابینكردنی ژیانێكی شایسته‌ بۆ هاونیشتمانیان له‌لایه‌ن حكومه‌ت ته‌وه‌ری گرنگی كۆبوونه‌وه‌كه‌ بوون و گفتوگۆی وردو جدیان له‌باره‌وه‌ كرا.

PUKmedia تایبه‌ت