لەوەڵامی پێداگرتنی پارتی جووڵانەوەی نەتەوەپەرستی توركیا بۆ داخستنی پارتی دیموكراتی گەلان، میرال دانیش باشتاش،  پەرلەمانتار لە پەرلەمانی توركیا و جێگری سەرۆكی لیستی فراكسیۆنی پارتی دیموكراتی گەلان رایگەیاند: ئەم پرسە پەیوەندی بەو هەوڵەكانی پارتی نەتەوەپەرستی توركیاوە هەیە كە دەیەوێت لەو هاوپەیمانێتییە بكشێتەوە كە لەگەڵ پارتی داد و گەشەپێدان پێكهیهێناوە بەناوی هاوپەیمانی خەڵك.

باشتاش لەمیانی لێدوانیدا بۆ رۆژنامەی (سۆزجۆ) ئاماژەی بەدوو ئەگەر داوە، یەكەمیان ئەوەیە، پارتی نەتەوەپەرست بەشوێن رێگەیەكدا دەگەڕێت تاوەكو لەهاوپەیمانێتی خەڵك جیا ببێتەوە، ئەگەری دووەمیش بریتییە لەو هەڵمەتەی كە پارتی دادو گەشەپێدان لەڕێگەی پارتی جووڵانەوەی نەتەوەپەرستەوە لەدژی پارتی دیموكراتی گەلان جێبەجێی دەكات.

باشتاش راشیگەیاند: لە ئێستادا پارتی دادو گەشەپێدان هەوڵ ئەدات لێدوانی سەركردەكانی پێشوو لە ئینتەرنێت بسڕێتەوە كە پێشترپشتیوانییان لە دانوستانی ئاشتی لەگەڵ پارتی كرێكارانی كوردستاندا دەكرد، هاوكات ئەوە بەتاوان دەزانن كە ئەندامانی پارتێكی كوردی كۆبوونەوە لەگەڵ هەندێك لەسەركردە كوردەكاندا بكەن.

ئەو پەرلەمانتارە بەرهەڵستكارەی كورد راشیگەیاند: پارتی دەسەڵاتدار هەرگیز ئەو هەڵوێستەی لەبەرامبەر پارتی دیموكراتی گەلان نەدەبوو ئەگەر بهاتبایە لە هەڵبژاردنی شارەوانیەكاندا پشتیوانی لێبكردایە.

باشتاش جەختیش دەكاتەوە كە پێشبینی ناكات پارتی دیموكراتی گەلان دابخرێت.

PUKmedia بەدواداچوون