له‌سه‌رو به‌ندی ساڵیادی كوردستانی نوێدا

پیرۆزبای له‌خۆم و ده‌سته‌ی دامه‌زرێنه‌رو سه‌رنوسه‌ر و ستاف و كارمه‌ندان  و ده‌سته‌ی نوسه‌ران و ڕۆشنبیران و هه‌مووئه‌وانه‌ ده‌كه‌م كه‌ڕۆژێك ماندووبونه‌ له‌ به‌ره‌و پێشچوونی ئه‌م ڕۆژنامه‌یه‌دا و هه‌روه‌ها پیرۆزبێت له‌ته‌واوی نوسه‌ران و خوێنه‌رانی ڕۆژنامه‌ی كوردستانی نوێ كه‌ ڕۆژنامه‌یه‌كی ڕۆژانه‌ی گرنگ و پڕ زانیاری هه‌مه‌جۆرو هه‌مه‌ ڕه‌نگه‌ ، دیاره‌ كوردستانی نوێ له‌سه‌ر ڕاسپارده‌و پشتیوانی ڕه‌وانشاد جه‌نابی مام جه‌لال دامه‌زراوه‌  كه‌مێژووی دامه‌زراندنی ده‌گه‌ڕێته‌وه‌ بۆ دوای ڕاپه‌ڕینی به‌هاری ساڵی ١٩٩١  كه‌ زنجیره‌یه‌ك ساڵه‌ خزمه‌ت ده‌كات و ڕۆژو شه‌وی خستوه‌ته‌ سه‌ر یه‌ك و ئێستاشی له‌گه‌ڵدابێت له‌و پێناوه‌دا به‌رده‌وامه‌و زیاتر له‌ ٨٢٦٥ ژماره‌ی به‌چاپ گه‌یاندووه‌ به‌ئامانجی هوشیاری كۆمه‌ڵگه‌ كه‌خۆی ده‌بینێته‌وه‌ له‌ زۆربه‌ی بواره‌ جیاجیاكانی وه‌ك په‌روه‌رده‌ ، زمان و كه‌لتور ، سیاسی ، ته‌ندروستی ، ئابوری ، وه‌رزشی ، هونه‌ری ، هوشیاری ، كۆمه‌ڵایه‌تی ، ئینیتمای خاك ...هتد 

 له‌هه‌ریه‌ك له‌وبوارانه‌دا خزمه‌تێكی به‌رچاوی كردووه‌ به‌ مه‌به‌ست وئامانج و هوشیاری تاكو كۆمه‌ڵگه‌ ،ئه‌مه‌ سه‌ره‌ڕای ئه‌وه‌ی هه‌موو بوجه‌و تێچونێكی ماددی وهیمه‌تێكی مه‌عنه‌ویی و سه‌رمایه‌یی مرۆیی له‌ئه‌ستۆی حزبێكی دیاریكراودایه‌ كه‌ یه‌كێتی نیشتیمانی كوردستانه‌ به‌ڵام ئه‌وه‌ مانای ئه‌وه‌ نه‌بووه‌ كه‌ ئه‌م ڕۆژنامه‌یه‌ مۆركێكی داخراوی حزبی پێوه‌ دیاربێت و لایه‌نگری كردبێت به‌ڵكو به‌ پێچه‌وانه‌وه‌ هه‌میشه‌ دیدو تێڕوانینی جیاواز و ته‌نانه‌ت ڕه‌خنه‌یش له‌م ڕۆژنامه‌وه‌ ئاراسته‌ی یه‌كێتی نیشتیمانی كوردستان كراوه‌ و ژماره‌و ئه‌رشیف ومێژوو شاهیدی ئه‌و ڕاستییه‌ ده‌ده‌ن كه‌ ڕۆژنامه‌یه‌كی ئازاو ئازادو بوێربووه‌ ، بێگومان به‌شێكی په‌یوه‌ندی به‌ سیاسه‌ت و جیهانبینی ڕه‌وانشاد جه‌نابی مام (جلال)وه‌ هه‌بووه‌ كه‌ هه‌میشه‌ له‌ یه‌كێك له‌ ووته‌ به‌نرخه‌كانی مام بۆ نوسه‌ران و هاوبیرو كه‌وادیره‌كانی یه‌كێتی نیشتیمانی كوردستان ئه‌وه‌ بووه‌ كه‌ هه‌ر ڕه‌خنه‌و سه‌رنجێكتان هه‌یه‌ له‌ ڕاگه‌یاندن و ڕۆژنامه‌كانی یه‌كێتدا ئازادانه‌و بێسه‌ڵه‌مینه‌وه‌ بیخه‌نه‌ ڕوو ، هه‌ربۆیه‌ له‌م یاده‌دا به‌فرسه‌تم زانی كوردستانی نوێ به‌وه‌ پێناسه‌ بكه‌م كه‌ قوتابخانه‌یه‌ك بووه‌ بۆ  قه‌ڵه‌مه‌ پڕ بڕشته‌كانی نوخبه‌و نوسه‌ران و خوێنه‌رانی هه‌موو ڕه‌نگه‌ جیاوازه‌كان به‌تایبه‌ت ئه‌وانه‌ی كه‌ توانیویانه‌ به‌شێوازێكی زانستی و به‌پێی بنه‌ماكانی یاسایی ڕۆژنامه‌گه‌ری بنوسن وه‌ ماڵێكیش بووه‌ بۆ دید و تێڕوانینه‌ جیاوازه‌كان و هه‌میشه‌ ده‌رگای له‌سه‌رپشت بووه‌ و ژماره‌و لاپه‌ڕه‌كانی هه‌مه‌ ڕه‌نگ و پڕ زانیاری ڕاست و دروست بووه‌ ،ئه‌مه‌ سه‌رباری ئه‌وه‌ی كه‌ له‌دنیای ته‌كنه‌لۆجیاو پێشكه‌وتندا نوسنی ئه‌لیكترۆنی ته‌واوی جیهانی ته‌نیووه‌ و زۆربه‌ی ڕۆژنامه‌كلاسیكی و ته‌قلیدی و شێوازه‌ كاغه‌زییه‌كانی هه‌ڵوه‌شاندووه‌ته‌وه‌ به‌ڵام كوردستانی نوێ هه‌میشه‌ له‌به‌ره‌و پێشچوون و نوێبونه‌وه‌دا بووه‌و هه‌ربه‌وه‌وه‌ نه‌وه‌ستاوه‌و هاوشانی ژماره‌و لاپه‌ڕه‌كانی شێوه‌ كاغه‌ز له‌ سایت و جیهانی ئه‌لیكترۆنیات و تۆڕه‌كۆمه‌ڵاتیه‌كانیش وتار و  بابه‌ته‌كانی پێشكه‌ش به‌خوێنه‌ربكات و ئه‌ركی چه‌ند هێنده‌ی ڕابردوو قورستربووه‌ به‌ڵام له‌وپێناوه‌دا ویستویه‌تی به‌هه‌ر ڕێگه‌و شێوازێك بێت خوێنه‌ر و نوسه‌ر له‌یه‌ك دانه‌بڕێت و پردی په‌یوه‌ندی ڕۆشنبیر و خه‌ڵكانی ئاسایی وه‌ك خوێنه‌ر و نوسه‌ر به‌هێز و پته‌وبێت و زانیاری و هه‌واڵی دروست پێشكه‌ش بكات له‌كۆتایدا جارێكی تر

دووباره‌ پیرۆزبای له‌خۆم و ته‌واوی خوێنه‌ران و نوسه‌رانی ئه‌م ڕۆژنامه‌یه‌ ده‌كه‌م به‌هیوام ئه‌م قوتابخانه‌یه‌ ڕۆژ له‌دوای ڕۆژ به‌رهه‌مدارترو گه‌شه‌ی زیاتر و خزمه‌تی باشتربه‌خوێنه‌ران بكات.

نوسینی / عه‌تا ته‌ها

PUKmedia تایبه‌ت